Կարծում եմ՝ բախտս բերել է, որ ապրել եմ դժվար ժամանակներում ու դժվար երկրում. Վալերի Գերգիևը պատմել է երաժշտական իր կուռքերի մասին

Դիրիժոր, Սանկտ Պետերբուրգի Մարիինյան թատրոնի գեղարվեստական ղեկավար և գլխավոր տնօրեն Վալերի Գերգիևը կոմպոզիտոր Սերգեյ Պրոկոֆևին անվանել է իր կուռքերից մեկը: Այս մասին նա հայտնել է Financial Times-ին տված հարցազրույցում:

Gazeta.ru-ն գրում է, որ Գերգիևի սերը Պրոկոֆևի երաժշտության հանդեպ ծագել է 9 կամ 10 տարեկան հասակում, երբ նա նվագել է կոմպոզիտորի` ֆորտեպիանոյի համար էտյուդներից մեկը:

«Ասես կայծակնահար եղած լինեի: Հնարավոր է` պատճառը սուր ներդաշնակությունն էր, կամ ռիթմը, կամ նույնիսկ ստեղների վրա անսովոր դիրքավորումը»,- պատմել է նա:

Այնուհետև Գերգիևը խոսել է Շոստակովիչի մասին՝ նրան կոչելով երաժշտական մեծ ֆիգուր. «Կարծում եմ, որ իմ, ինչպես նաև Շոստակովիչի բախտը բերել է, որ ապրել ենք դժվար ժամանակներում ու դժվար երկրում»։