39 օր հացադուլի մեջ գտնվող Արկադի Պապյանը ՔԿՀ-ից տեղափոխվել է քաղաքացիական հիվանդանոց, ապա նորից ՔԿՀ
39 օր հացադուլի մեջ գտնվող առանձնապես խոշոր չափերով կաշառք տալու մեջ մեղադրվող Արկադի Պապյանի ինքնազգացողությունը վատացել է, նրան քրեակատարողական հիմնարկից տեղափոխել են քաղաքացիական հիվանդանոց:
Այս մասին Tert.am-ի հետ զրույցում ասաց Արկադի Պապյանի պաշտպան Ամրամ Մակինյանը:
«Իմ պաշտպանյալի վիճակը լավ չէ, նա տեղափոխվել է հիվանդանոց, սակայն հրաժարվել է գլյուկոզա ստանալուց: Բժիշկը գտել է, որ ստացիոնար բուժման կարիք չունի, բժշկական հսկողության կարիք ունի, որը ՔԿՀ-ում առկա է»,-ասաց Մակինյանը:
Պաշտպանն ասաց, որ արդեն 39 օր տևող հացադուլից Պապյանը մտադիր չէ հրաժարվել.«Նա անգամ իմ հետ խոսելուց քնում է, հետո արթնանում ու շարունակում է խոսել, սակայն հացադուլից հրաժարվելու մտադրություն չունի, որովհետև պայքարի այդ ձևն է ընտրել: Իմ պաշտպանյալը պնդում է, որ իրեն առաջադրված մեղադրանքը հիմնավորված չէ»:
Պաշտպանը, Պապյանին առաջադրված մեղադրանքի վերաբերյալ ասաց, որ ապացույցները բացակայում են:
Արկադի Պապյանը մեղադրվում է «Վանաձոր» ՔԿՀ –ի պետ Գևորգ Մկրտչյանին ամիսներ շարունակ կաշառք փոխանցելու մեջ, ըստ մեղադրանքի նրան դրա դիմաց արտոնություններ են տրվել:










