ԱՄՆ-ում ուժի մեջ են թողել Էրդողանի թիկնապահների նկատմամբ առաջադրված մեղադրանքները

11:11 • 23.03.18

Միացյալ Նահանգների իրավապահներն ուժի մեջ են թողել անցած տարի Թուրքիայի նախագահ Ռեջեփ Թայիփ Էրդողանի ԱՄՆ այցի ընթացքում անկարգությունների առնչությամբ նրա անվտանգության ծառայության չորս աշխատակիցների դեմ մեղադրանքները: Այդ մասին «ՌԻԱ Նովոստի»-ին հայտնել է Կոլումբիայի դաշնային դատախազության ներկայացուցիչը:

Ավելի վաղ The Wall Street Journal-ը հայտնել էր, որ ԱՄՆ-ի դաշնային դատախազությունը չեղարկել է Թուրքիայի նախագահ Ռեջեփ Թայիփ Էրդողանի թիկնազորի 15 անդամից 11-ի դեմ ներկայացված մեղադրանքները, որոնք անցյալ տարվա մայիսին Վաշինգտոնում ծեծի էին ենթարկել Էրդողանի այցի դեմ խաղաղ ցույց անող հայերին և քրդերին:

«Նախագահ Էրդողանի անվտանգության ծառայության չորս աշխատակիցների դեմ մեղադրանքները մնում են ուժի մեջ»,- հայտնել է գործակալության զրուցակիցը:


Նա նշել է, որ այդ գործի շրջանակում Կանադայի երկու քաղաքացու դեմ առաջադրված մեղադրանքները նույնպես ուժի մեջ են մնում:

Հիշեցնենք, որ մայիսի 16-ին Միացյալ Նահանգներում Թուրքիայի դեսպանի նստավայրի մոտակայքում Էրդողանի ԱՄՆ այցի դեմ բողոքող խաղաղ ցուցարարների խումբը հարձակման էր ենթարկվել էրդողանամետ խմբերի կողմից։ The Washington Post-ի հաղորդմամբ՝ տեղի ունեցած բախումների հետևանքով ինը մարդ էր վիրավորվել, նրանք տեղափոխվել էին հիվանդանոց:

Սպիտակ տանն Էրդողանի և ԱՄՆ նախագահ Դոնալդ Թրամփի հանդիպման ընթացքում անցկացված ցույցը կազմակերպել էին մի շարք կազմակերպություններ, որոնց թվում են եղել նաև Ամերիկայի Հայ դատի հանձնախումբը և Ամերիկյան հելենական խորհուրդը: Ցույցին մասնակցել են մի շարք այլ խմբեր, որոնց թվում են եղել հայկական, հունական, քրդական և ասորական համայնքների ներկայացուցիչներ: