Մերկելը չի բացառել «Սկրիպալի գործի» առնչությամբ Ռուսաստանի դեմ «հետագա քայլերի» ձեռնարկումը

12:43 • 23.03.18

Գերմանիայի կանցլեր Անգելա Մերկելը չի բացառել, որ Սոլսբերիում ռուսական հետախուզական ծառայության նախկին աշխատակից Սերգեյ Սկրիպալի թունավորման առնչությամբ Եվրոպական Միության կողմից Ռուսաստանի դեմ «հետագայում քայլեր կձեռնարկվեն»։ Այս մասին հայտնում է Die Welt-ը։


«Մենք վճռական ենք և պատրաստ նույնիսկ լրացուցիչ միջոցներով արձագանքելուն», - ասել է Մերկելը Բրյուսելում ԵՄ գագաթնաժողովի առաջին օրվա ավարտին։


Մերկելի խոսքով՝ ԵՄ երկրների ներկայացուցիչները երկար քննարկել են այս հարցը, սակայն «միաձայն եկել են եզրակացության, որ ամեն ինչ բարձր հավանականությամբ վկայում է այն մասին, որ Ռուսաստանը կապված է թունավորման հետ և որ դրան ոչ մի այլ բացատրություն չկա»։


«Մոսկվայի դեմ հետաքա քայլեր ձեռնարկելու մասին որոշում կայացնելուց առաջ Բրյուսելը կսպասի Սկրիպալի և նրա դուստր Յուլյայի թունավորման ժամանակ օգտագործված նյութի անալիզի արդյունքին», - եզրափակել է Մերկելը։


Հիշեցնենք, որ Եվրամիության առաջնորդները պայմանավորվել են հետ կանչել Մոսկվայից ԵՄ դեսպանին՝ գերմանացի դիվանագետ Մարկուս Էդերերին, Սոլսբերիում ռուսական հետախուզական ծառայության նախկին աշխատակից Սերգեյ Սկրիպալի թունավորման առնչությամբ խորհրդակցությունների համար:


66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։ Նրանք գտնվում են հիվանդանոցում ծայրահեղ ծանր վիճակում:


Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում: