Լոնդոնում փորձել են գողանալ Ռեմբրանդտի երկու կտավները (լուսանկարներ)

Լոնդոնում Դալիչի պատկերասրահից` Rembrandt's Light ցուցահանդեսի ժամանակ, փորձել են գողանալ համաշխարհային արվեստի և հոլանդական գեղանկարչության ոսկեդարի խոշոր ներկայացուցիչ Ռեմբրանդտի երկու կտավները, հաղորդում է The Guardian-ը:

Ոստիկանները դեպքի վայր են ժամանել, երբ միացել է ազդանշանային համակարգը: Հոլանդացի նկարչի կտավներն ավելի ուշ հայտնաբերվել են պատկերասրահի տարբեր վայրերում։

«Որոշ ժամանակ ցուցահանդեսը և պատկերասրահը փակ են լինելու, որպեսզի ոստիկանները կարողանան ավելի մանրամասն հետաքննություն իրականացնել»,- հայտարարել է թանգարանի աշխատակիցը:

Պատկերասրահում չեն հստակեցրել, թե հատկապես որ կտավներն են փորձել գողանալ:

Հոկտեմբերի 4-ին բացված ցուցահանդեսում ներկայացվել են Ռեմբրանդտի 35 աշխատանքներ, այդ թվում՝ «Ընթրիք Էմմաուսում» (Լուվր), «Philemon and Baucis» (Վաշինգտոնի արվեստի ազգային պատկերասրահ), «Գետում լողացող կինը» (Լոնդոնի Ազգային պատկերասրահ) և այլ հայտնի կտավներ: