«Ջոկեր»-ի օպերատորը EnergaCamerimage փառատոնի գլխավոր մրցանակին է արժանացել

Օպերատոր Լոուրենս Շերը և ռեժիսոր Թոդ Ֆիլիպսը Լեհաստանում կայացած կինոօպերատորական արվեստի՝ «EnergaCamerimage» փառատոնին մրցանակի են արժանացել, գրում  է Variety-ն։

Փառատոնի ժյուրին Շերին գլխավոր մրցանակը («Ոսկե գորտ») շնորհել է «Ջոկեր» ֆիլմի օպերատորական աշխատանքի համար, որտեղ հոռետեսական սցենարը կինոդիտողներին կարողանում է հավասարակշռությունից հանել։

Փառատոնի «Արծաթե գորտ»-ը շնորհվել է օպերատոր Սեզար Շարլոնիին «Երկու պապերը» ֆիլմի համար, որտեղ գլխավոր դերերում հանդես են գալիս Էնթոնի Հոպկինսը և Ջոնաթան Փրայսը։

«Բրոնզե գորտ»-ը շնորհվել է Վլադիմիր Սմուտնիին՝  Վացլավ Մարխոուլի «Ներկված թռչուն» ֆիլմի համար։

«Հանդիսատեսի համակրանք» մրցանակը նույնպես հանձնվել է «Ջոկեր»-ին։

«EnergaCamerimage»-ը կինոօպերատորական արվեստի՝ աշխարհում խոշորագույն փառատոնն է։ Այս տարի փառատոնը տեղի է ունեցել նոյեմբերի 9-ից 16-ը՝ 27-րդ անգամ։