Թոդ Ֆիլիպսը խոստովանել է, որ Խոակին Ֆենիքսը երբեք պաշտոնապես չի ընդունել Ջոքերի դերի առաջարկը

«Ջոքեր» ֆիլմի ռեժիսոր Թոդ Ֆիլիպսը վերջերս հայտնել է, որ նախքան Խոակին Ֆենիքսի՝ խաղահրապարակ ներկայանալը, վստահ չի եղել, որ դերասանն ընդունել է դերի առաջարկը, գրում է MSN-ն:

Los Angeles Times թերթի հետ զրույցում Թոդ Ֆիլիպսը հայտնել է, որ Ֆենիքսին ֆիլմում ներգրավելը հեշտ չի եղել: «Սկզբում թվում է՝ թո´ւհ, կոմիքսների հիման վրա հիմնված ֆիլմ է լինելու: Այդ պատճառով էլ նա հակված չէր ընդունել առաջարկը»,- ասել է նա:

Ռեժիսորը նաև նշել է, որ դերասանին ճանաչելուց հետո նրան սկսել է բացատրել ֆիլմի իմաստը. «Սկսեցինք ավելի շատ զրուցել, թե ինչի մասին է լինելու ֆիլմը, և մի օր նա կախարդական կերպով հայտնվեց: Նա երբեք բառացի այո չի ասել դերի առաջարկին»:

Նա նաև խոստովանել է, որ չի շտապում ֆիլմի հաջորդ մասի նկարահանման հարցում:

Ավելի վաղ հարցազրույցներից մեկի ժամանակ ռեժիսորը հայտնել էր, որ Խոակինի հետ ևս մի ֆիլմ կնկարահանի՝ «համոզիչ ստեղծագործական պատճառ» ունենալու դեպքում:

Նշենք, որ «Ջոքերը» դարձել է պատմության մեջ առաջին ֆիլմը, որի հասույթը համաշխարհային վարձույթում գերազանցել է 800 մլն դոլարը:

Սեպտեմբերի 7-ին «Ջոքերը», որի գլխավոր դերակատարն «Օսկար» մրցանակի եռակի հավակնորդ Խոակին Ֆենիքսն է, արժանացել է Վենետիկի 76-րդ կինոփառատոնի «Սուրբ Մարկոսի ոսկե առյուծ» գլխավոր մրցանակին:

Խոակին Ֆենիքսի գլխավոր դերակատարմամբ ֆիլմը պատմում է Ջոքերի՝ Բեթմեն սուպերհերոսի գլխավոր թշնամու պատմությունը։ Ֆիլմի իրադարձությունները տեղի են ունենում 1980-ականներին: Ֆիլմում հանդես է եկել նաև «Օսկարի» կրկնակի դափնեկիր Ռոբերտ դե Նիրոն:

Ֆիմը համաշխարհային վարձույթում է հայտնվել հոկտեմբերի 4-ից։