Լոնդոնում կայացել է հեղինակավոր BAFTA մրցանակաբաշխությունը. հաղթողների թվում է նաև հայազգի Էնդի Սերկիսը (լուսանկարներ)

11:07 • 03.02.20

Կիրակի երեկոյան Լոնդոնում կայացել է կինոաշխարհի ամենակարևոր իրադարձություններից մեկը՝ ամենամյա BAFTA մրցանակաբաշխությունը, որն այս տարի անցկացվել է 73-րդ անգամ: Կինո և հեռուստաարվեստների բրիտանական ակադեմիան մրցանակաբաշխությունը կազմակերպել է «Ալբերտ հոլ» սրահում:

Ինչպես նշում է dailymail.co.uk-ը, ռեժիսոր Սեմ Մենդեսի «1917» ֆիլմն արժանացել է միանգամից յոթ մրցանակի՝ հաղթելով «Լավագույն ֆիլմ», «Լավագույն ռեժիսոր», «Լավագույն բրիտանական ֆիլմ», «Հատուկ վիզուալ էֆեկտներ», «Լավագույն կինեմատոգրաֆիա», «Լավագույն արտադրական դիզայն» և «Լավագույն ձայն» անվանակարգերում:

Ինչ վերաբերում է «Լավագույն դերասան» և «Լավագույն դերասանուհի» անվանակարգերին, ապա մրցանակի են արժանացել ամերիկյան աստղեր Խոաքին Ֆենիքսն ու Ռենե Զելվեգերը:

Հայտնի է, որ 45-ամյա Ֆենիքսը պարգևատրվել է «Ջոկեր» ֆիլմում գլխավոր դերը մարմնավորելու, իսկ 50-ամյա Զելվեգերը՝ Ջուդի Գարլենդի մասին «Ջուդի» կենսագրական ֆիլմում գլխավոր դերի համար:

Ի դեպ, «Ջոկեր» ֆիլմն առաջադրված է եղել 11 անվանակարգում, սակայն հաղթել է միայն երեքում:

«Երկրորդ պլանի լավագույն դերասանուհի» անվանակարգում հաղթել է Լորա Դերնը («Ամուսնական պատմություն»), իսկ երկրորդ պլանի լավագույն դերասան է ճանաչվել Բրեդ Փիթը («Մի անգամ Հոլիվուդում»): Քանի որ Փիթը ներկա չի եղել միջոցառմանը, նրա փոխարեն մրցանակը ստացել է նրա խաղընկերուհի Մարգո Ռոբին:

Մինչդեռ հայկական արմատներով բրիտանացի դերասան, ռեժիսոր Էնդի Սերկիսը պարգևատրվել է կինոոլորտում ունեցած զգալի ավանդի համար:

Սեմ Մենդես Ռենե Զելվեգեր Խոաքին Ֆենիքս