Գորբաչովը ողջունել է Լեռնային Ղարաբաղում հրադադարի մասին համաձայնությունը

20:34 • 10.10.20

ԽՍՀՄ առաջին նախագահ Միխայիլ Գորբաչովը ողջունել է Լեռնային Ղարաբաղում հրադադարի ռեժիմի մասին համաձայնագիրը և կողմերին կոչ է արել շարունակել բանակցությունները:

«Ես աջակցում եմ հրադադարին: Լավ է, որ արվել է այդ առաջին քայլը: Լավ է, որ Ռուսաստանն օգնել է: Սակայն շատ կարևոր է, որ դրանով չսահմանափակվեն»,- ТАСС գործակալության փոխանցմամբ՝ ասել է Գորբաչովը՝ մեկնաբանելով կողմերի միջև ձեռք բերված համաձայնությունը:

Նրա խոսքով՝ անհրաժեշտ է պայմանավորվել «այդ շատ ծանր խնդրի» կարգավորման եղանակների մասին, անհրաժեշտ է «քայլ առ քայլ աստիճանաբար լուծել այն»:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 10-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 162 անօդաչու թռչող սարք, 508 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4369 զոհ։ Հայկական կողմից, նախնական տվյալներով, կա 415 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել։