Սան Ֆրանցիսկոյում հարյուրավոր հայեր երթով անցել են Ոսկե դարպասներ կամրջով՝ ԱՄՆ իշխանություններին կոչ անելով դադարեցնել Թուրքիային և Ադրբեջանին տրամադրվող ռազմական օգնությունը (լուսանկար, տեսանյութ)
ԱՄՆ Սան Ֆրանցիսկո քաղաքում նախօրեին հայ համայնքի մասնակցությամբ բողոքի ցույց է տեղի ունեցել․ ցույցի մասնակիցները ԱՄՆ իշխանություններին կոչ են արել դադարեցնել Թուրքիային և Ադրբեջանին տրամադրվող ռազմական օգնությունը, հաղորդում է abc7news.com-ը։
Հարյուրավոր հայեր երթով անցել են Ոսկե դարպասներ կամրջով՝ ծածանելով Հայաստանի և Արցախի դրոշները։
«Թուրքիան և Ադրբեջանը ագրեսիվ պատերազմ են հրարել Արցախի դեմ։ Նրանք ռմբակոծում են քաղաքացիական բնակչությանը, և մենք շատ մտահոգված ենք, որ նրանք իսկապես փորձում են ավարտին հասցնել Հայոց ցեղասպանությանը, որը նրանք սկսել են 1915-ին»,- ասել է Ամերիկայի Հայ դատի հանձնախմբի ներկայացուցիչ Ռոզաննա Մակասջյանը։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 10-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 415 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել։
Տեսանյութը կարող եք դիտել այստեղ։










