Հատուկ պատրաստված խմբեր են մտցրել Հադրութ, որոնց նպատակը դիվերսիան չի եղել, այլ մինչև հրադադարը Հադրութը գրավելը, սակայն դա նրանց չի հաջողվել. Արայիկ Հարությունյան

11:12 • 11.10.20

Քանի որ Ալիևը հայտարարել էր, որ իբր գրավել են Հադրութ քաղաքը, իսկ զինադադարից ժամեր առաջ հասկացել է՝ շատ հեռու են Հադրութի սահմաններից, վերջին հարվածն ընտրել է Հադրութ քաղաքի ուղղությամբ: Այս մասին հրավիրված ասուլիսին ասաց Արցախի Հանրապետության նախագահ Արայիկ Հարությունյանը՝ անդրադառնալով հարցին՝ ինչ իրավիճակ է հիմա Հադրութում:

«Նրանք հաստատ ունեն պատրաստված ստորաբաժանումներ, պատրասված վարձկաններ և  երևի այլ երկրների հատուկ ծառայություններից ուժեր ու համատեղ ձևավորել են մի խումբ, որին ասենք «դիվերսիոն խումբ», բայց նպատակը դիվերսիան չի եղել, նպատակը եղել է ժամերի ընթացքում՝ նախքան այդ հրադադարը, գրավել Հադրութ քաղաքը»,- պարզաբանեց Հարությունյանը:

ԱՀ նախագահը հավելեց, որ նրանց հաջողվել է  այդ խմբերը մտցնել Հադրութ քաղաք և Հադրութի մոտակա տարածք. «Առաջին փուլում իրականացրել են ինչ-որ դիվերսիոն միջոցառումներ, բայց արդյունքում մեզ հաջողվել է վերաձևավորվել, վերադասավորվել և այսօր Հադրութ քաղաքի վարչական ղեկավարը գտնվում է Հադրութ քաղաքի վարչակազմի շենքում: Րոպեներ առաջ հետը կապ եմ հաստատել ու եկել: Այլ փակագծեր չեմ բացի»,- շեշտեց նա:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 10-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 415 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։

Հայաստանում և Արցախում սեպտեմբերի 27-ին հայտարարվել է ռազմական դրություն։

Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել։