Հարյուրավոր հայեր բողոքի ակցիա են անցկացրել Միչիգան նահանգի Կապիտոլիումի դիմաց՝ դատապարտելով Ադրբեջանի ագրեսիան
ԱՄՆ Միչիգան նահանգում նախօրեին հայ համայնքի մասնակցությամբ տեղի է ունեցել բողոքի ակցիա, որը կոչված էր ուշադրություն հրավիրել Լեռնային Ղարաբաղում Ադրբեջանի հրահրած պատերազմի վրա, գրում է WILX-ը։
Հայ համայնքի հարյուրավոր ներկայացուցիչները հավաքվել են Միչիգան նահանգի Կապիտոլիումի դիմաց՝ կոչ անելով համարժեք արձագանքել և դատապարտել թուրք-ադրբեջանական դաշինքի ագրեսիան ընդդեմ Արցախի:
«Ցանկանում եմ, որ սպանդը դադարի, որ Հայաստանն իրեն ապահով զգա։ Ես պարզապես ցանկանում եմ, որ իմ մարդիկ ապահով լինեն»,-ասել է ցույցի մասնակից Ալան Օհանյանը։
Ցույցի մեկ այլ մասնակից Իննա Միրզոյանի խոսքով՝ «թեև մարդիկ չեն կարծում, որ ԼՂ-ում տեղի ունեցող իրադարձությունները իրենց ազդեցությունը կունենան տեղական մակարդակում, սակայն ԱՄՆ-ի տարբեր մասերում մեծ հայկական համայնքներ կան, որոնք իսկապես ազդում են ամերիկյան ժողովրդի վրա»։
Ցույցի մասնակիցները նաև ընդգծել են, որ ԱՄՆ-ն պետք է ավելին անի հակամարտության կարգավորման համար։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 11-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 165 անօդաչու թռչող սարք, 510 միավոր զրահատեխնիկա, հիմնականում տանկեր, 86 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 4719 զոհ։ Հայկական կողմից, նախնական տվյալներով, կա 429 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 25 քաղաքացիական անձ, վիրավորվել է 102 քաղաքացիական անձ, վնասվել՝ մոտ 5800 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։
Հայաստանում և Արցախում սեպտեմբերի 27-ին հայտարարվել է ռազմական դրություն։
Հոկտեմբերի 10-ի ժամը 12:00-ից ուժի մեջ է մտել հրադադարը, սակայն ադրբեջանական զինուժը հրադադարից հետո դիվերսիոն գործողություն է իրականացրել, նաև հրթիռակոծել խաղաղ բնակավայրեր Արցախում։










