Սփյուռքում պարից չհասկացող ղեկավարներ կան, որոնք պարը դարձել են բիզնես. Սամվել Հարոյան

«Իմ Հայաստան» համահայկական փառատոնի հերթական փուլը՝ պարարվեստի օրերն արդեն ավարտվել են, այսօր փառատոնի պատասխանատուները Սփյուռքի նախարարությունից լրագրողների հետ հանդիպմանն ամփոփեցին արվածն ու ներկայացրեցին նախատեսվածը:


«Իմ Հայաստան» համահայկական փառատոնի տնօրեն Սամվել Հարոյանն ասաց, որ փառատոնի նպատակը՝ հայապահպանությունն է, այլ կերպ՝ հայահավաքությունը:


«Պարարվեստի պարերը գլխավոր նպատակին ծառայեցին: Լավագույն առիթներից մեկն է Սփյուռքի մեր երիտասարդությանը Հայաստան բերելու»,-ասաց նա և նշեց, որ Սփյուռքում բազմաթիվ հայկական պարախմբեր են գործում:


Ըստ նրա՝ միայն Ռուսաստանում դրանց թիվը անցնում է 150-ը, իսկ աշխարհում էլ՝ 300-ից ավելի է: Նա տեղեկացրեց, որ խմբերը ապահովվել են չորսօրյա կեցության և սննդի պայմաններով, որից օգտվել են մասնակիցների 90%-ից ավելին:


Սամվել Հարոյանը նշեց, որ պարախմբերը եղել են հանրապետության բոլոր մարզերում, իսկ բոլոր դահլիճները լեփ լեցուն են եղել: «Աշնակ գյուղում մեծ միջոցառում կազմակերպվեց: Ստեփանակերտում ամենից մեծ բացօթյա համերգն անցկացվեց»,- ասաց նա:


Հորդանանի և Լիբանանի խմբերը հայտ էին ներկայացրել, սակայն չեն կարողացել մասնակցել։ Ըստ Հարոյանի՝ նրանց հնարավորություն կտրվի միջոցառումներն անցկացնել ուշացումով:


Պատասխանատուները խոսեցին նաև բացթողումներից՝ համաձայնելով, որ խմբերի հագուստները չէին համապատասխանում հայկական տարազներին և միաժամանակ նշեցին, որ թեև դա իրենց խնդիրը չէր, սակայն խմբերի ղեկավարների հետ խոսել են այդ մասին, որպեսզի շտկեն դա։


«Իսկապես ունենք պարարվեստում խնդրիր: Դրսում ունենք ղեկավարներ, որոնք պարից շատ հեռու են: Պարարվեստը դարձրել են բիզնես և սա շատ հարցերում խանգարում է: Որակական չափանիշներին համապատասխանելու խնդիր ունենք և հիմա այդ չափորոշիչները մշակվում են»,- ասաց Սամվել Հարոյանը:


Սփյուռքի նախարարության համահայկական ծրագրերի իրականացման վարչության պետ Ատոմ Մխիթարյանն իր հերթին նշեց, որ փառատոնը իրականացվում է ամբողջ տարվա ընթացքում:

«Փառատոնը մեկնարկել է ապրիլ ամսից, որը սկսել է գրողների համահայկական միջոցառմամբ, ապա հունիսից պարի փառատոնն էր, որին մասնակցեց 31 խումբ՝ 1000-ից ավելի մասնակիցներով»,- ասաց նա և ավելացրեց, որ առաջիկայում անհատ կատարողները կգան Հայաստան, որից հետո արդեն օգոստոսին երգչախմբի արվեստի օրերն են, իսկ դուդուկի փառատոնը նախատեսված է սեպտեմբերին:

Համահայկական փառատոնը կեզրափակվի լրագրողների համահայկական համաժողովով:

Ատոմ Մխիթարյանը հույս հայտնեց, որ փառատոնը շարունակական կլինի. «Ենթադրվում է, որ յուրաքանչյուր երկրորդ տարին կկազմակերպվեն, բայց կառավարության որոշումը միայն 2012-ին էր վերաբերում»,- նկատեց նա: