Պատմամշակութային հուշարձաններն աղտոտված են. ահազանգում են մասնագետները

Պատմամշակութային հուշարձաններն աղտոտված են. ահազանգում են մասնագետները
Հայաստանի պատմական հուշարձաններն աղտոտված են այնքանով, որքանով ունենում են այցելուներ, այսինքն, ինչքան շատ են այցելուները, այնքան ավելի շատ է աղտոտվածությունը, այսօր լրագրողների հետ հանդիպման ժամանակ նման հայտարարություն արեց այսօր հուշարձանագետ Սամվել Կարապետյանը:

«Զբոսաշրջիկները աղտոտվածությունը տեսնելով՝ զարմանում ու հիասթափվում են: Տեսնում են, որ կապ չկա ստեղծողի և պահպանողի միջև: Կարծես՝ մենք ժամանակավոր տարածք ենք զբաղեցրել, բայց նույնիսկ նման դեպքերում մարդն իր հետևից հետքեր չպետք է թողնի»,- ասաց նա:

Տուրիզմի հայկական ինստիտուտի ռեկտոր Ռոբերտ Մինասյանը նշեց. «Չի լինում, երբ մեր տուն մարդ գա և մենք չպատրաստվենք ու ամեն ինչ իր տեղը չդնենք: Այդպես պետք է վարվենք նաև մեր երկրի հետ: Մեր երկիրը տուրիզմը հռչակել է գերակա ուղղություն: Իսկ դա միայն հռչակելով չի ավարտվում: Մենք պետք է սկսենք մեզանից և առաջին հերթին՝ երիտասարդներից»:

Ռեկտորը նշեց, որ երկիրը պետք է սիրել ոչ թե գրքերով, այլ ճանաչելով՝ շրջելով ու պահպանելով այն: Նա առաջարեց, մրցույթ հայտարարել մարզերի միջև, թե որտե՞ղ է է ավելի շատ մաքրություն պահպանվում: Վերջինս վստահ է, որ դա իր արդյունքն անպայման կտա:

«Միացյալ Հայաստան» խմբի հիմնադիր Արշակ Զաքարյանը, ով ամեն օր աշխատում է զբոսաշրջիկների հետ և նրանց ուղեկցում Հայաստանի պատմամշակութային վայրեր, նշեց, որ հաճախ զբոսաշրջիկներն իրենք են սկսում հավաքել աղբը:

«Չինացի մի աղջկա էի ուղեկցում Հավուց թառ, և նա ճանապահին հավաքել էր մի պարկ աղբ: Իսկ երբ ճանապարհին ուզեցինք թափել այդ աղբը՝ տեղ չկար: Ստիպված մեզ հետ Երևան բերեցինք:Մինչև վերջերս ամենամաքուր տեղը Հավուց թառն էր: Վերջերս այնտեղ ճանապարհ են կառուցել և սննդի օբյեկտներ կառուցել: Աղբը թափում են տեղի միակ ջրհորի մեջ»,- ասաց նա:

Արշակ Զաքարյանը նշեց, որ կա նաև աղբամանների խնդիր՝ միաժամանակ հավելելով, որ մեր հասարակության շրջանում բացակայում է աղբը աղբամանում թափելու սովորությունը: