Կոմիտասի արժեքավոր ձեռագրերի համար անհրաժեշտ գումարը չի հաջողվել գտնել

Կոմիտասագետ Արթուր Շահնազարյանին առ այսօր չի հաջողվել հայթայթել այն 7000 ԱՄՆ դոլարը, որն անհրաժեշտ էր կոմիտասյան մի շատ արժեքավոր ձեռագիր գնելու ու այն Կոմիտասի դիվանին նվիրելու համար: 

«Հիմա մի հինգ օրվա մեջ սպասում եմ պատասխանի, եթե չէ, ուրեմն այդ ձեռագրերը նորից կգնան, կկորչեն»,- Tert.am–ի հետ զրույցում ասաց նա։

Ինչպես ավելի վաղ տեղեկացրել էինք՝ այս ձեռագիրը կարող է տանել Կոմիտաս վարդապետի կորած համարվող արժեքավոր ձեռագրերի հետքերի վրա, և Արթուր Շահնազարյանը մոտ մեկ ամիս առաջ տեղեկացրել էր, որ Ռուսաստանից բերված կոմիտասյան ձեռագրերով տետրը ձեռք բերելու համար արդեն դիմել է «չորս-հինգ տեղ» և սպասում է պատասխանի:

Հայաստանյան մշակույթի փոքրաթիվ մեկենասներից մեկից Արթուր Շահնազարյանն արդեն իսկ մերժում է ստացել, այն «հիմնավորմամբ», թե Կոմիտասն իրենց «ճյուղը չէ»:

Հիշեցնենք, որ սեպտեմբերի 19-ին հանդիսավոր պայմաններում Հայաստանի նախագահ Սերժ Սարգսյանի, նրա տիկնոջ` Ռիտա Սարգսյանի հետ և Ամենայն հայոց կաթողիկոս Գարեգին Բ-ի ներկայությամբ տեղի ունեցավ Կոմիտասի թանգարան-ինստիտուտի շենքային համալիրի նախագծի հանրային ներկայացման հանդիսավոր արարողությունը:

Համալիրի նախագծի հեղինակ, ճարտարապետ Արթուր Մեսչյանն էլ լրագրողների հետ զրույցում նշել էր, որ «աշխատել են ստեղծել ապագայի համար հոգևոր մի կառույց, հոգևոր մի արժեք» և ավելացրել՝« ինչքանով կստացվի, կտեսնենք»:

Համալիրը ունենալու է թանգարանային մաս, գիտահետազոտական կենտրոն, համերգային դահլիճ, երաժշտական ստուդիա, գրադարան, հրատարակչություն:

Իսկ կառուցապատման ծախսերը հոգում է «Փյունիկ» մարդկային ռեսուրսների զարգացման հիմնադրամը` սիրիահայ բարերար Գաբրիել Ջամբարջյանի աջակցությամբ: