Հուսով եմ, որ մեր ակտիվությունը կստիպի World Music Awards-ին մեր երկրի հանդեպ ավելի ուշադիր լինել. Սիրուշո

Երգչուհի Սիրուշոն, ով վերջերս ներկայացվել էր համաշխարհային ճանաչում ունեցող World Music Awards մրցանակաբաշխության անվանակարգում ֆեյսբուքի իր էջում գրառում է կատարել։

Գրառումը՝ ստորև։

«Մի օր շնորհավորական նամակ ստացանք մեր արտասահմանյան գործընկերներից մեկից՝ World Music Awards-ի պաշտոնական կայքի հղումով: Չեմ կարող նկարագրել, թե ինչ կատարվեց ինձ հետ: Սա ավելին էր, քան անձնական նվաճում, սա նշանակում էր, որ կարողացել ենք կոտրել մի հսկայական պատ, որը միշտ եղել է մեր և նմանատիպ համաշխարհային միջոցառումների միջև:

Ինձ համար կարևոր է նաև այն, որ նոմինացվել եմ հայալեզու երգով: Այս մեծամասշտաբ միջոցառմանը մրցանակ ստանալու ակնկալիք իհարկե չեմ կարող ունենալ: Նոմինացված լինելն ինձ համար արդեն ամենաանսպասելի և հաճելի հաղթանակն էր: Ավելի մեծ հաղթանակ էր այն աջակցությունը, որը տեսա իմ հայրենակիցների կողմից. այդ համախմբվածությունը մեր ազգային առանձնահատկություններից իմ ամենասիրելին է:

Շնորհակալ եմ այդքան տարածելու և քվեարկելու համար: Հուսով եմ, որ մեր ակտիվությունը կստիպի այս համաշխարհային միջոցառմանը և նմանատիպ միջոցառումներին մեր երկրի հանդեպ ավելի ուշադիր լինել, ընդունել մեր մրցունակությունը և ավելի հաճախ ներգրավել հայ արտիստներին: Իսկ ես կփորձեմ ավելի շատ աշխատել, որպեսզի նորից ընդգրկվեմ նոմինանտների շարքում և ավելի կայուն դիրք ունենամ»։