Իսլամիստներն Իրաքում հրահանգել են թլպատել բոլոր կանանց
«Իրաքի և Լևանտի իսլամական պետություն» խմբավորման զինյալներն Իրաքում իրենց վերահսկողության տակ գտնվող տարածքներում հրահանգել են թլպատել բոլոր կանանց, տեղեկացնում է gazeta.ru-ն՝ Reuters գործակալությանը հղումով:
Այդ մասին այսօր հայտարարել է Իրաքում ՄԱԿ-ի հումանիտար հարցերով ներկայացուցիչ Ժակլին Բադկոկը:
«Դա ֆետվա է (կրոնական որոշում), և այդ մասին մենք իմացել ենք այսօր առավոտյան»,-ասել է Բադկոկը:
ՄԱԿ-ի ներկայացուցիչը նշել է, որ իսլամիստները հանձնարարել են թլպատել 11-ից 46 տարեկան բոլոր կանանց և աղջիկներին:
Կանանց թլպատումը համարվում է վիրահատական միջամտություն, որի ընթացքում հեռացվում կամ վնասվում է նրանց սեռական օրգանների մի մասը, որն արվում է առանց ցավազրկման և առանց բժշկական ցուցումների՝ կրոնական դրդապատճառներով:










