Սեն Արևշատյանի քաղաքացիական հոգեհանգիստը տեղի կունենա Կոնդի Սբ Հովհաննես եկեղեցում

Անվանի գիտնական, հայագետ, ակադեմիկոս, փիլիսոփա, Մեսրոպ Մաշտոցի անվան Մատենադարանի նախկին տնօրեն Սեն Արևշատյանի քաղաքացիական հոգեհանգիստը տեղի կունենա երկուշաբթի՝ Երևանի Սուրբ Հովհաննես եկեղեցում՝ ժամը 18 00-ից սկսած, այս մասին Tert.am –ին հայտնեց Մատենադարանի ներկայիս տնօրեն Հրաչյա Թամրազյանը:


Իսկ հաջորդ օրը՝ հուլիսի 29-ին Սեն Արևշատյանի մարմինը կտեղադրվի Գիտությունների ազգային ակադեմիայում, որտեղ ժամը 12-ից մինչև 14-ը ցանկացողները կարող են վերջին հրաժեշտն ու հարգանքի տուրք մատուցել անվանի գիտնականին:

Հիշեցնենք, որ Սեն Արևշատյանը շուրջ 25 տարի` 1982-2007 թվականներին եղել է Մատենադարանի տնօրենը, հեղինակ է ավելի քան 150 գիտական աշխատությունների, այդ թվում 30 մենագրությունների և բազմաթիվ հոդվածների, որոնք լույս են տեսել ոչ միայն Հայաստանում, այլև՝ Մոսկվայում, Փարիզում, Վարշավայում, Շտուտգարտում, Սանկտ Պետերբուրգում, Աթենքում, Կահիրեում և այլուր։ Դրանք վերաբերում են հիմնականում հայ հին և միջնադարյան փիլիսոփայության պատմությանը։