Լոնդոնում կցուցադրվեն Կոկո Շանելի հայտնի բնակարանի լուսանկարները (լուսանկարներ)

Լուսանկարիչ Սեմ Թեյլոր Ջոնսոնը մի շարք լուսանկարներ է արել Կոկո Շանելի բնակարանում. ֆոտոշարքը կցուցադրվի Լոնդոնի Saatchi Gallery պատկերասրահում, գրում է buro247.ru-ն։
Թեյլոր Ջոնսոնը պատահական չէ իր նախագիծն անվանել «Երկրորդ հարկ». լեգենդար Շանելի բնակարանը գտնվել է անմիջապես նրա ընկերության խանութի վերևում՝ Փարիզի Կամբոն փողոցում։

45 լուսանկարները ցույց կտան, թե ինչպես է ապրել Շանելը։ Լուսանկարիչը ներկայացնում է իր աշխատանքներում հայտնի ապակե աստիճանը, փորագրված կահույքը, բյուրեղապակյա ջահերը և բազմաթիվ գրքերը։

Այս բնակարանն այնքան էլ հայտնի չէ, ինչպես Շանելի հարկաբաժինը «Ռիտց» հյուրանոցում։ Մինչդեռ հենց այս բնակարանում է նա ընդունել և զվարճացրել իր հյուրերին։ Այս բնակարանում է Շանելը պահել նորաձևության իր սեփական հավաքածուն։ Համաձայն լեգենդի, ամեն անգամ, երբ Շանելը վերադարձել է տուն, ծառայողները սենյակներում Chanel № 5 օծանելիք են ցանել։

Saatchi Gallery պատկերասրահում ցուցադրությունը կանցկացվի սեպտեմբերի 12-22-ը։