Լարս ֆոն Թրիերը վախենում է, որ «սթափվելուց հետո» չի կարողանա այլևս ֆիլմ նկարահանել

Դանիացի հայտնի սկանդալային ռեժիսոր Լարս ֆոն Թրիերը հայտարարել է, որ վախենում է, թե չի կարողանա այլևս ֆիլմ նկարահանել սթափվելուց հետո, քանի որ իր մրցանակակիր ֆիլմերը ստեղծվել են հարբած վիճակում, գրում է Washington Times-ը:

Վերջին երեք տարվա ընթացքում իր առաջին հարցազրույցում Ֆոն Թրիերը դանիական Politiken օրաթերթին տված հարցազրույցում պատմել է, որ նա այլևս չի խմում օրական մեկ շիշ օղի, ոչ էլ թմրանյութեր է օգտագործում, որոնք նրան օգնել են մտնել «զուգահեռ աշխարհ»:

Սթափվելու պատճառով Ֆոն Թրիերն ասել է. «Ես չգիտեմ, թե արդյո՞ք կարող եմ նոր ֆիլմեր նկարել: Դա ինձ հանգիստ չի տալիս»:

2011 թվականին «Նիմֆոմանուհու» ռեժիսորը «պերսոնա նոն գրատա» («անցանկալի անձ») էր հայտարարվել Կաննի կինոփառատոնի ժամանակ՝ Ադոլֆ Հիտլերին իր համակրանքն արտահայտելու պատճառով: Նա ավելի ուշ ասել է, որ կատակ է արել, և հայտարարել, որ այլևս չի խոսի հանրության առաջ: