Բրուտյանը կա ու կմնա հայկական փիլիսոփայական մտքի նահապետը. տեղի ունեցավ գիտնականի քաղաքացիական հոգեհանգիստը

Փիլիսոփայական գիտությունների դոկտոր, պրոֆեսոր, ՀՀ ԳԱԱ ակադեմիկոս Գևորգ  Բրուտյանի քաղաքացիական հոգեհանգիստը տեղի ունեցավ այսօր Գիտությունների ազգային ակադեմիայի շենքում: Գիտնականին հրաժեշտ տալու էին եկել տարբեր ոլորտի գիտնականներ, հասարակական ու քաղաքական գործիչներ:

Այստեղ էր նաև «ժառանգություն» կուսակցության ղեկավար Րաֆֆի Հովհաննիսյանը, ով եկավ ու խոնարհվեց գիտնական առջև, ցավակցեց հարազատներին և հեռացավ:
 

Գևորգ Բրուտյանի կոլեգաներից փիլիսոփայական գիտությունների թեկնածու Յուրի Հովականյանը, ում նաև դասավանդել է մեծ գիտնականը, Tert.am-ի հետ զրույցում ասաց, որ հրաշալի գիտնականը ոչ միայն հայկական ժամանակից փիլիսոփայությունը կարողացավ ներկայացնել համաշխարհային փիլիսոփայական մտքին, այլ նաև իր ուրույն տեղը գրավեց:
 

«Եթե այսօր համաշխարհային փիլիսոփայության պատմության մեջ հայկական ժամանակակից փիլիսոփայությունը հիշատակվում է, ապա հիշատակվում է նաև Գևորգ Աբելիչի անունով. նա ստեղծել է իր փիլիսոփայության դպրոցը՝ փաստարկման, փիլիսոփայության դպրոցը, որը ամբողջ աշխարհում ընդունում են, որ Գևորգ Աբելիչինն է: Այս առումով ես այն կարծիքին եմ, որ նա բացառիկ գիտնական է: Նա նաև բազմում աշակերտներ թողեց իրենից հետո»,-ասաց նա:
 

Յուրի Հովականյանն ընդգծեց, որ բոլորին խորհուրդ է տալիս կարդալ Գևորգ Բրուտյանի «Փիլիսոփայությունը երկխոսություններում» երկհատորյակը, որն ամբողջական պատկերացում է տալիս, թե ինչ է փիլիսոփայությունը և ինչի համար է պետք:
 

«Նա նաև հրաշալի մանկավարժ ու հրաշալի մարդ էր, մենք իրենից ամենակարևորը սովորել ենք՝ ինչպես ճիշտ ապրել»,-ասաց նա:

Փիլիսոփայական գիտությունների դոկտոր Մանուկ Հարությունյանն էլ ընդգծեց, որ Բրուտյանը հայկական փիլիսոփայական մտքի նահապետն էր և կմնա միշտ այդպիսին:
 

«Եթե այսօր կարող ենք ասել՝ ունենք տրամաբանության լավագույն ձեռնարկներ, տրամաբանական ուսումնասիրություններին նվիրված լավ աշխատություններ, լեզվաբանության փիլիսոփայություն, ապա հենց նրա շնորհիվ է: Նրա աշխատությունները տարբերվում են հասկանալի, մատչելի, խորիմաստ լեզվով: Նրա լեզուն զերծ է վերացականությունից, որը սովորաբար վերագրվում է փիլիսոփաներին: Նրա գրքերը կարդացվում են բավականությամբ»,-ասաց նա:

Գևորգ Բրուտյանին,նկարագրելով որպես մարդ, նրա գործընկերն ասաց, որ ահռելի մեծ ավյուն ու կենսական էներգիա ուներ:

Գևորգ Բրուտյանի հուղարկավորությունը տեղի կունենա այսօր Երևանի քաղաքային պանթեոնում:
 

Հիշեցնենք, որ Գևորգ Բրուտյանը մահացել է դեկտեմբերի 8-ին՝ կյանքի 89-րդ տարում: Նա
ՀՀ ԳԱԱ նախագահի խորհրդականն էր, Խ.Աբովյանի անվան հայկական պետական մանկավարժական համալսարանի Մետափիլիսոփայության, փոխակերպական տրամաբանության և փաստարկման տեսության միջազգային ինստիտուտի նախագահ, փիլիսոփայական գիտությունների դոկտոր, պրոֆեսոր: