Porsche-ն պատասխանատվություն չի կրում դերասան Փոլ Ուոքերի մահվան համար. ամերիկյան դատարան

Porsche ավտոարտադրողը պատասխանատվություն չի կրում «Ֆորսաժ» ֆիլմաշարի աստղ Փոլ Ուոքերի մահվան համար. հիշեցնենք, որ դերասանը վթարի էր ենթարկվել Porsche Carrera GT ավտոմեքենայով։

Այդ մասին վճիռ է կայացրել ԱՄՆ-ի դատարանը, հաղորդում է BBC-ի ռուսական ծառայությունը:

Դատարանը վճիռ է կայացրել՝ քննելով Ուոքերի ընկերոջ՝ վթարի ժամանակ ղեկին գտնված Ռոջեր Ռոդասի այրու հայցը։ Ռոդասի այրին պնդել է, որ ավտոմեքենայում չի եղել անվտանգության համակարգի մի քանի կարևոր բաղադրիչ: Քրիստին Ռոդասը նաև հայտարարել է, որ ավտոմեքենան թերություն է ունեցել։

Դատարանը վճռել է, որ Ռադասը չի ներկայացրել իր պնդումների ապացույցները։

Այդ հայցով դատարանի վճիռը, այնուամենայնիվ, կարող է ազդեցություն չունենալ Porsche-ի դեմ դերասանի կնոջ և դստեր ներկայացրած համանման հայցերի վրա։

Ամերիկացի դերասանը, ով հայտնի էր «Ֆորսաժ» ֆիլմերից, մահացել է ավտովթարի հետևանքով, Լոս Անջելեսի արվարձանում, 2013 թվականի դեկտեմբերին: Նա 40 տարեկան էր։