Երեկ 3000 թուրք անկարգություններ են սադրել Վիեննայում

14:03 • 17.07.16

 

 

Թուրքիայում հեղաշրջման փորձի օրը Վիեննայում ապրող թուրքերն ազդաշչակներով աղմուկ –աղաղակ են բարձրացրել փողոցներում` այսկերպ իրենց աջակցությունը հայտնելով Թուրքիայի նախագահ էրդողանին:


Այս մասին «ֆեյսբուքի» իր էջում գրել է Ավստրո-հայկական մշակութային ընկերության վիեննաբնակ նախագահ Ռազմիկ Թամրազյանը:


Ներկայացնում ենք գրությունն ամբողջությամբ:


«Երեկ գիշեր անտանելի դրություն  էր Վիեննայի 4-րդ թաղամասում, որտեղ գտնվում է Թուրքիայի դեսպանատունը: Ժամը 23-ից սկսած վիեննաբնակ թուրքերը մեքենաներով և   Թուրքիայի դրոշով ամեն կողմից շարժվում  էին դեպի իրենց դեսպանություն՝ ի պաշտպանություն իրենց երկրի ղեկավարի: Հարյուրավոր  ավստրիական  ոստիկաններ փորձում էին սկսած գոռում-գոչումը, մեքենաների ազդաշչակները, բարձրաձայն «Աստված  մեծ է» վանկարկումները և  շրջապատի ապրողների հանգստի խանգարումը, նվազագույնի հասցնել: Թաղի այդ մասի բոլոր ապրողները, հետևում էին դեպքերին իրենց պատշգամբներից (ես էլ դրանց մեջ) և  պատուհաններից, երբեմն-երբեմն էլ վրդովելով և բարձրաձայն արտահայտվելով,  որ գնացեք ձեր երկրում արեք, ինչ որ ուզում եք: Այս բոլորը հազիվ  ավարտվեց  առավոտյան  ժամը 3:30-ին, որից հետո բազմությունը  (ըստ ավստրիական Հեռուստատեսության` ավելի քան երեք հազար) ոստիկանության  հսկողության տակ քայլեցին դեպի քաղաքի կենտրոն: Ճիշտն ասած,  այս գրության  և  իմ մտորումների պատճառը, ոչ թե  Թուրքիայի հեղաշրջումն էր, այլ այն, որ արդյոք քանի հայ իր տնում ունի Հայաստանի դրոշ և  մենք ինչքանո՞վ ենք պատրաստ, որևէ  ժամանակ կես  գիշերին Հայաստանին զորավիգ լինելու պատճառով փողոց դուրս գանք: 
Ինչպես երջանկահիշատակ  Հրաչյա Մաթևոսյանը  կասեր` պինդ կացեք և լավ մնացեք»: