Վիրավորված ոստիկան Արամ Հովհաննիսյանի կյանքին վտանգ չի սպառնում. բժիշկ

16:55 • 18.07.16

Հուլիսի 17-ին  «Սասնա ծռեր» ջոկատի հետ փոխհրաձգության ժամանակ  վիրավորված ոստիկանության գնդապետ Արամ Հովհաննիսյանի վիրահատությունը հաջող է անցել: Նա   որովայնի  շրջանում  բեկորային վնասվածք էր ստացել, բեկորը հեռացվել է, այժմ վերականգնողական բուժում է ստանում:

Այս մասին  լրագրողների հետ զրույցում ասաց Կենտրոնական  զինվորական հոսպիտալի  վիրաբուժական  բաժնի պետ Սևակ Շահբազյանը:

Դեպքի օրը   Արամ Հովհաննիսյանի հետ  տեղափոխվել էր  նաև փոխգնդապետ Հրաչյա  Խոստեղյանը` քունքային վնասվածքով:  Համապատասխան բուժօգնություն ստանալուց հետո ոստիկանության աշխատակիցը  դուրս է գրվել: Այս պահին  զինվորական հոսպիտալում   բուժվում է  միմիայն  Արամ Հովհաննիսյանը, ում  կյանքին վտանգ չի սպառնում:

Հիշեցնենք, որ երեկ առավոտյան մի խումբ զինված անձինք մտել են ՀՀ ոստիկանության պարեկապահակային ծառայության գնդի տարածք և բռնության սպառնալիքով պատանդ են պահում են այնտեղ գտնվող ոստիկաններին: Այսօր արդեն բանակցությունների արդյունքում պատանդներից մեկն ազատ է արձակվել: Պատանդ են մնացել 4 ոստիկան են, այդ թվում նաև՝ Երևանի փոխոստիկանապետ Վալերի Օսիպյանը և փոխոստիկանապետ Վարդան Եղիազարյանը: