Էրդողանը հաշված րոպեների տարբերությամբ է փրկվել մահից

09:55 • 18.07.16

Թուրքիայի նախագահ Ռեջեփ Թայիփ Էրդողանը երկրում ռազմական հեղաշրջման փորձի ժամանակ հաշված րոպեների տարբերությամբ է փրկվել մահից: Այդ մասին հայտնում է Reuters գործակալությունը՝ վկայակոչելով իր աղբյուրներին:

 

Հաղորդվում է, որ Թուրքիայի առաջնորդը զբոսաշրջային Մարմարիսում հյուրանոցը լքել է իրեն սպանել կամ ձերբակալել պատրաստվող զինվորականների ժամանելուց րոպեներ առաջ։

 

Ապստամբները, ինչպես հայտնում է Reuters-ը՝ վկայակոչելով CNN Turk-ին, Մարմարիս են ուղարկել երեք ուղղաթիռ՝ 25 զինվորով: Զինվորականները պարաններով իջել են ուղղաթիռներից, սակայն հյուրանոցում նրանց դիմադրել է նախագահին հսկող հատուկ նշանակության ուժերի ջոկատը:

 

Ուրբաթ երեկոյան թուրք զինվորականները փորձել են գրավել իշխանությունը: Հեղաշրջման ձախողումից հետո ուժայինները ձերբակալել են ավելի քան վեց հազար մարդու:

 

Անկարայի տվյալներով ապստամբության փորձի հետևանքով զոհվել է 290 մարդ: