«Սասնա ծռեր» խմբի հետ փոխհրաձգության ժամանակ վիրավորված ոստիկանի վիճակը կայունանում է

17:56 • 19.07.16

Հուլիսի 17-ին էրեբունու ոստիկանական բազայի գրոհի ժամանակ փոխհրաձգության արդյունքում վիրավորված ոստիկանը` 45-ամյա Գագիկ Մկրտչյանը, դեռ շնչում է արհեստական շնչառության ապարատի օգնությամբ: Նրա վիճակը կայուն ծանր է:

Այս մասին Tert.am-ի հետ զրույցում ասաց Համալսարանական կլինիկական թիվ 1 հիվանդանոցի Անզգայացման և ինտենսիվ թերապիայի ծառայության ղեկավար Իրինա Մալխասյանը։

Մալխասյանի խոսքերով՝ Գագիկ Մկրտչյանը հիվանդանոց է տեղափոխվել դարձյալ հրազենային ծանր վնասվածքով: «Մեզ մոտ ընդունվել է ստոծանու, կրծքավանդակի, լյարդի, աղիների վնասումով, ներքին արյունահոսությամբ: Մեկ վիրահատություն է տարել, որի ժամանակ ամեն ինչ կարվել է: Որևէ օրգան չի հեռացվել: Նա մինչ այժմ արհեստական շնչառության ապարատով է շնչում: Վիճակը կայունացել է»,-ասաց Մալխասյանը:

Մամուլում գրվել է, որ Գագիկ Մկրտչյանը բախման օրը հերթապահության է եղել և գրոհի ժամանակ գտնվել է ՊՊԾ գնդի տարածքում:

Նշենք, որ ծանր վիճակում է նաև «Սասնա ծռեր» խմբի անդամ 26-ամյա Թաթուլ Թամրազյանը, ով «Էրեբունի» ԲԿ վերակենդանացման բաժին է տեղափոխվել ներքին արյունահոսությամբ ու ծանր վիճակում՝ կյանքին սպառնացող վտանգով: Նա ստացել է որովայնի ձախ կեսի հրազենային վիրավորում և մի շարք վիրահատությունների ենթարկվել, հեռացվել է նրա ձախ երիկամը, հաստաղու մի հատվածը:

Հիշեցնենք, որ երկու օր առաջ մի խումբ զինված անձինք մտել են ՀՀ ոստիկանության պարեկապահակային ծառայության գնդի տարածք և պատանդ են պահում են այնտեղ գտնվող ոստիկաններին: Փոխհրաձգության արդյունքում մահացել էր գնդապետ Արթուր Վանոյանը, ևս երկու ոստիկան վիրավորում էին ստացել։

Բանակցությունների արդյունքում պատանդներից երեքն ազատ են արձակվել: Պատանդ են մնացել 4 ոստիկան, այդ թվում նաև՝ Երևանի փոխոստիկանապետ Վալերի Օսիպյանը և փոխոստիկանապետ Վարդան Եղիազարյանը: