Ազատության հրապարակում կազմակերպված հանրահավաքին հաջորդեց երթ
22.00
Երևանի Ազատության հրապարակում մեկնարկած հանրահավաքը շարունակվեց երթով՝ ի աջակցություն այսօր իշխանություններին հանձնված «Սասնա ծռեր» զինված խմբի։
21.02
Շուրջ 15 օր Երևանում Ոստիկանության պարեկապահակային ծառայության գունդը գրաված «Սասնա ծռեր» խումբը հանձնվեց իշխանություններին, սակայն Ազատության հրապարակում մեկնարկել է հերթական հանրահավաքը:
«Սասնա ծռերին» աջակից խմբի համակարգող խորհրդի անդամ Տիգրան Խզմալյանը Ազատության հրապարակում հայտարարեց, որ չճշտված տեղեկություններով՝ զինված խմբի անդամների մի մասը որոշ պայմանների դիմաց զենքը վայր է դրել։
Նշենք, որ այսօր հանրահավաքները համակարգող Ալբերտ Բաղդասարյանը հայտարարել էր համակարգող խորհրդի գործունեության մասին. «Համակարգող խորհուրդը, որի անդամն եմ նաև ես, հայտարարել է իր գործունեության դադարեցման մասին՝ ելնելով այն բանից, որ մեծ մասը՝ նաև Ալեք Ենիգոմշյանը, կալանված կամ ձերբակալված են, մի մասն էլ ինչ-ինչ պատճառներով ի վիճակի չեն շարունակել իրենց գործունեությունը»։
Հիշեցնենք, որ քիչ առաջ «Առաջին լրատվականին» է զանգահարել «Սասնա ծռեր» խմբի անդամ Վարուժան Ավետիսյանը՝ հանդես գալով հայտարարությամբ, որում խոսում է զենքերը վայր դնելու մասին:










