«Եվրատեսիլի» անցկացման համար Ուկրաինայի պետբյուջեից 15 միլիոն եվրո կտրամադրվի

Ուկրաինայի պետբյուջեից նախատեսվում է «Եվրատեսիլ» երաժշտական մրցույթի անցկացման համար 15 միլիոն եվրոյի չափ գումար տրամադրել, հաղորդում է ЛІГА.net-ը՝ հղում անելով երկրի կառավարության մամուլի ծառայությանը։

Նշվում է, որ Ուկրաինայի նախարարների կաբինետը Госкомтелерадио-ին հանձնարարել է 2017 թվականի պետբյուջեի ծրագրի պատրաստման ժամանակ ֆինանսների նախարարության հետ միասին «Եվրատեսիլի» անցկացման համար նախատեսել ոչ պակաս, քան 15 միլիոն եվրոյի համարժեք գումար։

Աղբյուրը մանրամասնում է, որ 2016 թվականի հուլիս ամսին Ուկրաինայի կառավարությունը Եվրոպական հեռարձակողների միությանը տվել է «Եվրատեսիլի» անցկացման համար նախատեսված 15 միլիոն եվրո չափով գումարի երաշխիքներ։