Բողոքի ակցիա ավտոապահովագրողների բյուրոյի շենքի դիմաց. տաքսիստները դժգոհում են ապահովագրության թանկացումից (տեսանյութ)
Այսօր մի շարք տաքսու վարորդները և տաքսի ծառայությունների տնօրեններ բողոքի ակցիա էին իրականացնում ՀՀ ավտոապահովագրողների բյուրոյի շենքի դիմաց։ Ակցիայի մասնակիցների խոսքով ՝ ԱՊՊԱ համակարգի վերջին փոփոխություններով ավելի թանկ վճարումներ պետք է կատարեն։
«Սա բարեփոխում չէ, այլ չարեփոխում, այսքան ժամանակ տեսե՞լ եք, որ մեր պետությունն ընդունի որևէ մի օրենք, որ ժողովրդի համար բարենպաստ լինի: Որ օրենքը հակաժողովրդական է՝ ողջ կառավարությունը երկու ձեռքով կողմ է քվեարկում, ինչի՞ պիտի մենք կրկնակի ավել վճարենք»,- դժգոհում էին նրանք։
Վարորդները պնդում էին, որ չնայած նրան, որ հայտարարվում է, թե ավտոմեքենայի սեփականատիրոջ կողմից ավտոմեքենան կարող է վարման հանձնվել վարորդական իրավունք ունեցող ցանկացած անձի` առանց նրա համար հավելյալ ապահովագրավճար վճարելու, տաքսիների պարագայում ավել են վճարում։
Վարորդներին չի գոհացնում նաև «Բունուս-Մալուս» համակարգը։ «Անկախ նրանից մեքենան ով է վարել, սեփականատիրոջից են միավորներ խլում»,- մանրամասնեցին ակցիայի մասնակիցները։
Վարորդները և «Ավտովարորդների իրավունքների պաշտպանության լիգա» ՀԿ նախագահ Տիգրան Հովհաննիսյանը հանդիպեցին ավտոապահովագրողների բյուրոյի տնօրեն Վահան Ավետիսյանի հետ: Վերջինս նշեց, որ լրատվամիջոցների ներկայությամբ հարցը քննարկել չեն նախատեսլ, բայց վարորդները բարձրացրեցին իրենց հուզող հարցերը։ Վահան Ավետիսյանը պարզաբանեց, որ տաքսիների պարագայում ԱՊՊԱ-ն թանկանում է ռիսկայնության գործոնը հաշվի առնելով։










