Վլադիմիր Գասպարյանի հրամանով ՊՊԾ գնդում նշանակումներ են արվել

Ոստիկանությունում կադրային փոփոխություններ են արվել։

Tert.am-ի տեղեկություններով ՀՀ ոստիկանության պարեկապահակետային ծառայության գնդում նոր նշանակումներ են արվել։ Տեղեկությունը Tert.am-ի հետ զրույցում հաստատեց ՀՀ ոստիկանության ԶԼՄ-ների հետ կապի բաժնի պետ Էդգար Ջանոյանը.«Ոստիկանության պետի հրամանով ՊՊԾ գնդի հրամանատարի անձնակազմի գծով տեղակալ է նշանակվել Հայկ Բրգանունցը»։

Ջանոյանը նաև տեղեկացրեց, որ համալրվել է ևս մեկ պաշտոն։ Նրա խոսքով՝ ՊՊԾ գնդի 3-րդ գումարտակի (կարմիր բերետներ) հրամանատար է նշանակվել Հայկազ Ճոմարդյանը, ով նույնպես ՊՊԾ գնդի ծառայող է և սպասարկում էր Կենտրոն վարչական տարածքը։

Հիշեցնենք, որ հունվարի 19-ին ՀՀ ոստիկանության կոլեգիայի նիստի ժամանակ ՀՀ ոստիկանապետ Վլադիմիր Գասպարյանի հայտարարել էր, որ համակարգում կադրային լուրջ քաղաքականություն են վարելու, և այն կարծրացած մարդիկ, ովքեր չեն կարողանում ձևափոխվել, կփոխարինվեն երիտասարդներով։