Բրազիլիայում շունը 4 ամիս հիվանդանոցի դռան առաջ կանգնած սպասում է մահացած տիրոջ վերադարձին

23:03 • 16.03.18

Բրազիլիայում անանուն շունը 4 ամիս շարունակ կանգնած է մնացել Սան Պաուլոյի հիվանդանոցներից մեկի առաջ՝ սպասելով իր մահացած տիրոջ վերադարձին:

Ինչպես ներկայացնում է Oddity Central-ը, 59-ամյա տղամարդուն հոսպիտալացրել էին դանակից ստացած վնասվածքներով: Անօթևան տղամարդուն դանակահարել էին վիճաբանության ժամանակ: Նրա կյանքը փրկել չի հաջողվել, և հոկտեմբերից ի վեր շունը, որը շտապ օգնության մեքենայի հետևից վազելով հասել էր հիվանդանոց, դեռ սպասում է նրան:

Մարդիկ նկատելով հավատարիմ շանը, ուտելիք են բերել նրա համար, ինչպես նաև ծածկոց, որի վրա կենդանին տեղավորվել է: Ինչպես նշվում է, շունը երբեք չի փորձել ներս մտնել հիվանդանոց, թեև հաստատության դռները գրեթե միշտ բաց են լինում:

Շանը օրեր առաջ տարել են կենդանիների կացարան՝ խոստանալով նոր տեր գտնել նրա համար, սակայն շունը փախել է և վերադարձել հիվանդանոց:

Կենդանու հավատարմությամբ ապշած՝ ընդունարանի աշխատակցուհիներից մեկը ինքն է որոշել տուն տանել շանը, սակայն դեռ հայտնի չէ՝ կենդանին կհարմարվի նոր տիրուհուն, թե կրկին կվերադառնա: