Թալիշը պետք է հարատևի․ համայնքապետը՝ գյուղում իրականացվող աշխատանքների մասին
Արցախի Հանրապետության Թալիշի համայնքապետ Վիլեն Պետրոսյանի խոսքով՝ ապրիլյան պատերազմի հետևանքով Արցախից հեռացած թալիշցիներից մոտ երկու հարյուրը կրկին վերադարձել են Արցախ՝ բնակություն հաստատելով տարբեր վայրերում, մեծ մասը՝ Ալաշանում:
Tert.am-ի հետ զրույցում նա ներկայացրեց ապրիլյան պատերազմից հետո համայնքում տիրող վիճակը:
«Թալիշում այս պահին չունենք ապրող ընտանիքներ: Այնտեղ թալիշցի տղամարդիկ են աշխատում՝ շինարարությունում, բանակում և այլն»,- ասաց նա։
Երկու տարի առաջ պատերազմի հետևանքով Արցախից հեռացած թալիշցիների վերադարձը, ըստ Վիլեն Պետրոսյանի, կազմակերպվել է Արցախի իշխանության կողմից, բնակիչներն ապահովվել են մեքենաներով, որպեսզի տան գույքը կարողանան նորից տեղափոխել Արցախ:
Թալիշում հիմա, ըստ համայնքապետի, վերականգնման աշխատանքներ են տարվում. դրանք այն ծրագրերն են, որոնք նախորդ տարվանից են կյանքի կոչվել:
«17 առանձնատների վերականգնման աշխատանքներն ավարտվել են,երկուսի շինարարությունը դեռ շարունակվում է»,- տեղեկացրեց նա: Համայնքապետի խոսքով՝ հիմա ճիշտ չի լինի, որ 17 առանձնատան բնակիչներին վերադարձնեն Թալիշ: Նա նշեց, որ հիմա Ալաշանում գործող դպրոցի անձնակազմում կան ուսուցիչներ այդ 17 առանձնատան բնակիչներից:
«Եթե, օրինակ, այդ ուսուցչուհին գնա Թալիշ, այնտեղ դպրոց չի լինելու, որովհետև աշակերտների մեծ թիվ չի լինի, իսկ Ալաշանում էլ ուսուցչի պակաս կզգացվի»,- ասաց նա՝ նշելով, որ նախատեսում են ևս 24 տուն վերականգնել, արդեն չափագրական աշխատանքներ կատարել են, դրանից հետո արդեն կբարձրացվի Թալիշը բնակեցնելու հարցը:
Հարցին ի պատասխան, թե թալիշցիները ցանկանո՞ւմ են իրականում վերադառնալ իրենց բնակավայր, Վիլեն Պետրոսյանը նշեց՝ այդ հարցի պատասխաններն այնքան էլ ստույգ չեն: «Կան ցանկացողներ, որոնց թիվը ավելի մեծ է, և կան չցանկացողներ»,- ասաց նա:
Իսկ համայնքապետի ցանկությունն այն է, որ Թալիշի մասին պատմական թելը չկտրվի: «Թալիշի պատմությունը գալիս է միջնադարից: Այդ պատմության թելն իրավունք չունի հենց այնպես կտրվել: Ի վերջո Թալիշը պետք է գոյատևի, հարատևի: Չեմ կարող ասել՝ ինչ կարգավիճակով, բայց հենց այնպես չէ, որ այդ պատմական վայրը մնացել է մեր ձեռքը: Մեր գյուղը մեր ձեռքում է, մեր հսկողության տակ է: Եվ այնպես չէ, որ ամեն ինչ վերջացել է»,- ասաց նա:
Վիլեն Պետրոսյանի խոսքով՝ այնպես չէ իհարկե, որ թշնամու կողմից սադրանքների վախ չկա թալիշցիների շրջանում, բայց այնպես էլ չէ, որ այդ վախը նախկինում էլ չի եղել:
«Այնպես չէր, որ այն ժամանակ Թալիշի անվտանգությունը հարյուր տոկոսանոց էր, այսօր էլ՝ չկա: Այն ժամանակ էլ վտանգավոր էր: Այսօր չկա մի հատված, որ հարյուր տոկոսանոց անվտանգ է՝ լինի ճակատային գիծ, թե դրանից հեռու հատված: Բայց այսօր նաև այդ անվտանգության համար երաշխիք են այն սարքավորումները, որոնք դրված են սահմանին․ ապրիլյան պատերազմի ժամանակ մեր բնակչությունն այնքան չէր վախեցել հրետանուց, որքան դիվերսիոն խմբից, որ թափանցել էր թիկունք և խաղաղ բնակիչների էր սպանել: Կա նաև առավել կարևոր մի հանգամանք, որ Թալիշ վերադառնանք՝ մեր տներն այնտեղ են, մեր մտերիմների գերեզմաններն այնտեղ են: Դժվար կլինի, բայց մեր տունն է այնտեղ»,- ասաց նա:










