Մարտի 24-25-ը ՀՀ–ում տեղի ունեցած ուժեղ քամու հետևանքով 129 արտակարգ դեպք է գրանցվել, որից 54-ը՝ Երևանում
Մարտի 24-ից 25-ը Հայաստանի տարածքում գրանցված ուժեղ քամու հետևանքով ԱԻՆ 911 ծառայությունում գրանցված ահազանգերից ՓԾ ստորաբաժանումների կողմից սպասարկվել է 129 դեպք. հիմնականում վնասվել են շինությունների տանիքներ, կոնստրուկցիոն տարրեր, շրջվել են ծառեր և կոտրվել ճյուղեր, ինչպես նաև վնասվել են գովազդային վահանակներ, սյուներ, որոնք խոչընդոտել են երթևեկությունը։ Այս մասին Tert.am-ին հայտնեցին ՀՀ արտակարգ իրավիճակների նախարարությունից:
Միայն Երևանում գրանցվել է 54 ահազանգ, որից 8-ը՝ շրջված ծառ (վնասվել է 4 ավտոմեքենա, 5 դեպքերում երթևեկությունը խաթարվել է), 17-ը՝ շենք- շինությունների կառուցատարրերի վնասում, 29-ը՝ շենք-շինությունների տանիքների վնասում, 5-ը՝ այլ դեպքեր (ալեհավաք, պաստառ, էլ.սյուն):
Արագածոտնի և Արմավիրի մարզերում գրանցվել է 5 ահազանգ, համապատասխանաբար՝ շենք-շինությունների կառուցատարրերի և շինությունների տանիքների վնասի մասին: Բոլոր 5 ահազանգերն էլ սպասարկվել են:
Արարատի մարզում գրանցվել է 15 ահազանգ, բոլորը սպասարկվել են (1-ը՝ շրջված ծառ, 13-ը՝ շենք-շինությունների տանիքների վնասում, 1-ը՝ այլ):
Կոտայքի մարզում ավելի շատ արտակարգ դեպքեր են գրանցվել. 35 ահազանգ, որից սպասարկվել է 35-ը (34-ը՝ շենք-շինությունների տանիքների և 1 ավտոմեքենայի վնասում)։
Գեղարքունիքի մարզում գրանցվել է 2 ահազանգ, որից սպասարկվել է 2-ը (շենք- շինությունների տանիքների վնասում), Լոռու մարզում՝ 3 ահազանգ, որից սպասարկվել է 3-ը (2-ը շենք շինությունների տանիքների վնասում, 1-ը՝ այլ), Շիրակի մարզում գրանցվել է 8 ահազանգ, որից սպասարկվել է 8-ը (շենք- շինությունների տանիքների վնասում):
Միայն մեկ ահազանգ է գրանցվել Տավուշի մարզում՝ շենքի տանիքի վերաբերյալ:












