Մարիա Զախարովան անակնկալ է խոստացել Մեծ Բրիտանիայի իշխանություններին
Ռուսաստանի Դաշնության ԱԳՆ պաշտոնական ներկայացուցիչ Մարիա Զախարովան բրիտանական իշխանություններին անակնկալ է խոստացել: Այդ մասին նա ասել է «Ռոսիա-1» հեռուստաալիքի «Воскресный вечер с Владимиром Соловьевым» հաղորդման ժամանակ, հաղորդում է «ՌԻԱ Նովոստի»-ն:
Զախարովայի խոսքով՝ ռուս նախկին լրտես Սերգեյ Սկրիպալի թունավորման գործով Մեծ Բրիտանիայի գործողությունները խոսում են այն մասին, որ երկրի իշխանություններն անցել են «համաշխարհային մասշտաբի սև փիարի» կոնցեպտի: Ընդ որում՝ նա նշել է, որ Ռուսաստանի դեմ տեղեկատվական արշավը վատ է մշակված:
«Մենք անակնկալ ունենք բոլոր նրանց համար, ովքեր կամ խիղճ ունեն, կամ համարձակություն համեմատելու, ինչ-որ կերպ զուգահեռներ տանելու Ռուսաստանի և Երրորդ ռեյխի միջև»,- հավելել է Զախարովան:
Ավելի վաղ Մեծ Բրիտանիայի արտգործնախարար Բորիս Ջոնսոնը զուգահեռ էր տարել 2018 թվականի ֆուտբոլի աշխարհի առաջնության և նացիստական Գերմանիայում 1936 թվականի օլիմպիական խաղերի միջև:
Հիշեցնենք, որ Մեծ Բրիտանիայի վարչապետ Թերեզա Մեյն օրեր առաջ հայտարարել էր 23 ռուս դիվանագետի արտաքսելու մասին՝ ռուս նախկին լրտես Սերգեյ Սկրիպալի ու նրա դստեր թունավորման առնչությամբ: Նա հայտարարել էր նաև Ռուսաստանի հետ բարձր մակարդակով կնքված պայմանագրերի չեղարկման մասին: Բացի այդ, չեղարկվել է Մեծ Բրիտանիա այցելելու համար Ռուսաստանի արտգործնախարար Սերգեյ Լավրովին ուղարկված հրավերը:
Մեյը նաև հայտնել էր, որ բրիտանացի նախարարները և բարձրաստիճան պաշտոնյաները չեն այցելի Ռուսաստանում կայանալիք Ֆուտբոլի աշխարհի առաջնությանը:
66-ամյա նախկին լրտես Սերգեյ Սկրիպալը և նրա դուստրը մարտի 4-ին նյարդապարալիտիկ գազի ազդեցության են ենթարկվել անգլիական Սոլսբերի քաղաքի առևտրի կենտրոններից մեկում և անգիտակից վիճակում տեղափոխվել հիվանդանոց։ Նրանք գտնվում են հիվանդանոցում ծայրահեղ ծանր վիճակում:
Սկրիպալը Ռուսաստանում 2006 թվականին դատապարտվել էր Մեծ Բրիտանիայի օգտին լրտեսելու համար, իսկ 2010 թվականին նրան ներում է շնորհվել երեք այլ ռուսների հետ: Ավելի ուշ նրանց փոխանակել են ԱՄՆ-ում ձերբակալված ռուս գործակալների հետ: Սկրիպալն ապաստան էր ստացել Մեծ Բրիտանիայում:










