Նույն ցուցմունքով Ա. Մարտիրոսյանն ու Դ. Սանասարյանն ազատ արձակվեցին, իսկ ես կալանքի տակ եմ. Անդրիաս Ղուկասյանը բացարկի միջնորդություն ներկայացրեց դատավորին ու դատախազին
Էրեբունի և Նուբարաշեն վարչական շրջանների ընդհանուր իրավասության դատարանում շարունակվում է «Ոտքի՛ Հայաստան» քաղաքացիական նախաձեռնության համակարգող Անդրիաս Ղուկասյանի դատաքննությունը՝ դատավոր Վարդան Գրիգորյանի նախագահությամբ:
Դատական նիստի ընթացքում պաշտպանական կողմը մի շարք միջնորդություններ ներկայացրեց:
«Հարգելի՛ դատարան, նախորդ նիստերի ընթացքում թույլ եք տվել արտահայտություններ, որոնք ենթադրում են, որ անկողմնակալ չեք, ընդգծված բացասական վերաբերմունք ունեք պաշտպանական կողմի նկատմամբ, կատարում եք դատավարության այլ կողմի ամենաապօրինի քմահաճույքները, ինչի համար նախկինում հայտարարություն է արվել: Դատախազ Պետրոսյանի հայեցողությամբ ու դատարանի կատարմամբ Անդրիաս Ղուկասյանի նկատմամբ դատական իրավունքի խախտումներն այնպիսի կոպիտ ու բացահայտ բնույթ են կրում, որ հավանաբար այս գործը հիշվելու է որպես «դատախազ Պետրոս Պետրոսյանն ու դատավոր Գրիգորյանն ընդդեմ Անդրիաս Ղուկասյանի» գործ»,-ասաց Ղուկասյանի պաշտպան Կարեն Մեժլումյանը և փորձեց ներկայացնել խախտումները։ Սակայն դատավորն ընդհատեց՝ ասելով, որ դրանք կրկնվում են:
«Եթե նոր բան ունեք ասելու, ես թույլ կտամ շարունակել Ձեր հայտարարությունը, եթե նոր բան չունեք ու հինը 1000 անգամ պետք է կրկնեք, ապա թույլ չեմ տա: Նույնը կրկնում եք, տաֆտալոգիա է ստացվում»,-ասաց դատավորը:
«Տաֆտալոգիա չէ, մենք սա ներկայացնում ենք որպես շարունակական խախտում»,-ասաց փաստաբանը՝ հավելելով, որ այդ տեքստն այնքան է ասելու, որ մինչև իր միջնորդությունները չբավարարվեն:
Փաստաբանն ասաց, որ Անդրիաս Ղուկասյանի դեմ քրեական գործն հարուցվել է ոստիկանության ապօրինություններն արդարացնելու համար. «Վկաների ցուցմունքներից ակնհայտ է, թե ինչպիսի շինծու մեղադրանքով է գործը քննվում: Այս գործով Անդրիաս Ղուկասյանին նման մեղադրանքներ են առաջադրվել՝ արդարացնելու Սարի թաղում ցուցարարների ու լրագրողների նկատմամբ ոստիկանների կողմից թույլ տրված ապօրինությունները»:
Փաստաբանն ասաց, որ դատարանն անաչառ չէ և միջնորդեց ինքնաբացարկ հայտնել, իսկ ինքնաբացարկ չհայտնելու դեպքում միջնորդեց հրապարակել տուժող Գոռ Գևորգյանի նախաքննական ցուցմունքը և նրան հարցաքննել հակասությունների վերաբերյալ:
Փաստաբանը նաև նշեց, որ նախորդ նիստերից մեկում դատարանը թույլ չի տվել ցուցմունք տալ գործով վկա Եղիշե Պետրոսյանին:
Դատավորին ինքնաբացարկ հայտնելու միջնորդության վերաբերյալ ամբաստանյալ Անդրիաս Ղուկասյանն ասաց, որ իր խափանման միջոց կալանավորումը փոխելու միջնորդության վերաբերյալ որոշման մեջ դատարանը նշել է, որ ազատության մեջ մնալով՝ Անդրիաս Ղուկասյանը կարող է լուրջ վտանգ ներկայացնել հանրային կյանքում:
«Եթե դուք նշեիք, որ ես կարող եմ լուրջ վտանգ ներկայացնել Սերժ Սարգսյանի գլխավորած կոռուպցիոն ռեժիմին, ես համաձայն կլինեի Ձեզ հետ: Բայց Ձեր սահմանումը որևէ հիմնավորում չունի: Ինձ կալանավորել եք, ըստ իս՝ Էդգար Պապիկյանի սուտ ցուցմունքների հիման վրա: Նա սուտ ցուցմունք է տվել իմ, Դավիթ Սանասարյանի և Արմեն Մարտիրոսյանի դեմ, մեղադրողն այդ ցուցմունքը հիմնավոր ապացույց չի համարում, որ Արմեն Մարտիրոսյանին և Դավիթ Սանասարյանին մեղադրական եզրակացություն ներկայացնի: Դա մեղադրողի վերաբերմունք է այդ ապացույցին, որի հիման վրա ինձ պահում են կալանքի տակ։
Դատարանը համարել է, որ դրանք բավարար միջոցներ չեն, որպեսզի Արմեն Մարտիրոսյանն ու Դավիթ Սանասարյանը գտնվեն ազատության մեջ և որևէ խնդիր չի տեսել իրենց գրավով ազատելու համար, իսկ ինձ պահում է կալանքի տակ»,-ասաց Անդրիաս Ղուկասյանը:
Մեղադրող Պետրոս Պետրոսյանը Անդրիաս Ղուկասյանի հայտարարության վերաբերյալ ասաց, որ մանրամասներ չի հրապարակի մեկ այլ գործի մասով, որով դեռ նախաքննությունը շարունակվում է, իսկ հանրային կյանքում վտանգ ներկայացնելն ամրագրված է Քրեական դատավարության օրենսգրքում և Սահմանադրությամբ:
«Քանի որ ամբաստանյալին մեղսագրվում են երկու առանձնապես ծանր հանցագործությունների փորձ կատարելու մեղադրանքներ, որոնք հասարակական անվտանգության դեմ են ուղղված, հետևաբար պնդում եմ, որ վկայակոչված փաստերով կարող են իրենց հարցերի պատասխանն իմանալ»,-ասաց դատախազը:
Ինչ վերաբերում է Էդգար Պապիկյանի ցուցմունքին, Պետրոս Պետրոսյանը հարցրեց՝ ինչի՞ց է ամբաստանյալը ենթադրել, որ մեկ մեղադրյալի մասով նրա ցուցմունքները վերագրելի կամ արժանահավատ չեն: Մեղադրողն ասաց, որ միջնորդությունը ենթակա է մերժման, այն անհիմն է:
Դատավոր Վարդան Գրիգորյանը, անդրադառնալով միջնորդություններին, ասաց, որ փաստաբանը հեռու է Քրեական դատավարության մասին օրենսգրքից:
«Ի՞նչ է նշանակում միջնորդում եմ ինքնաբացարկ հայտնեք, եթե ոչ՝ հրապարակեք նախաքննական ցուցմունքը. դա ևս մեկ անգամ հաստատում է, որ Դուք հեռու եք Քրեական դատավարության մասին օրենսգրքից: Ինչ վերաբերում է Եղիշե Պետրոսյանին չհարցաքննելուն, երևի 7 ամսական եք ծնվել: Անընդհատ ուզում եք դեպքերից առաջ ընկնել: Պետրոսյանին ոչ ոք չի արգելել ցուցմունք տալ, նա կգա դատարան և ցուցմունք կտա, դրա համար կա համապատասխան փուլ»,-ասաց դատավորը:
Փաստաբան Կարեն Մեժլումյանն անդրադարձավ դատարանի այն արտահայտությանը, որ փաստաբանը չի տիրապետում Քրեական դատավարության մասին օրենսգրքին. «Ես պետք է բացարկ հայտնեմ, որովհետև Դուք նման բան եք ասում»:
«Ասեմ-ասեմ, պետք է հայտնեք, ինչ տարբերություն: Դուք քանակ եք ապահովում բացարկի ու հայտարարությունների հետ կապված»,-նկատեց դատավորը:
Կարեն Մեժլումյանն ասաց, որ ցավալի է, որ Բարձրագույն դատական խորհրդի դատավորի վարքագծի վերաբերյալ հնարավոր է դիմել միայն գործի ավարտից հետո և ներկայացրեց միջնորդությունը:
Այնուհետև բացարկի միջնորդություն ներկայացվեց նաև դատախազ Պետրոս Պետրոսյանին: Անդրիաս Ղուկասյանն ասաց, որ դատախազը կողմնակալ է:
Պաշտպանը ևս միացավ միջնորդությանը՝ասելով, որ առաջին անգամ չէ, որ դատախազը կողմնակալ վերաբերմունք է դրսևորել սույն գործով:
Պաշտպանական կողմի միջնորդության վերաբերյալ մեղադրող դատախազ Պետրոս Պետրոսյանն ասաց, որ միջնորդությունն անհիմն է, չփաստարկված: Միջնորդությունների վերաբերյալ դատական ակտեր կայացնելու համար դատարանը գնաց խորհրդակցական սենյակ:
Հիշեցնենք, որ Անդրիաս Ղուկասյանին մեղադրանք է առաջադրվել 2016թ. հուլիսի 29-ին Երևան քաղաքում զանգվածային անկարգություններ կազմակերպելու, հուլիսյան դեպքերի ժամանակ Խորենացի փողոցում ՀՀ ՊՊԾ գնդի տարածքում գտնվող շենքերը, շինությունները և տրանսպորտային միջոցները զավթած, ոստիկաններ և բուժաշխատակիցներ պատանդ վերցրած կազմակերպված զինված խմբին միանալու փորձի, ինչպես նաև «զինվելու, ապօրինի կերպով հրազեն ու ռազմամթերք կրելու, պահելու և խմբի անդամների հետ համակատարմամբ զավթած ու պատանդներին պահելու փորձերի մեջ», սակայն հանցագործություններն ավարտին չի հասցրել իր կամքից անկախ հանգամանքներով:
Ըստ մեղադրանքի՝ Անդրիաս Ղուկասյանի գործողություններից տուժել է 36 անձ: Նրան մեղադրանք է առաջադրվել ՀՀ ՔՕ-ի 225-րդ հոդվածի 1-ին մասի, 34-219-րդ հոդվածի 3-րդ մասի 1-ին կետի, 34-218-րդ հոդվածի 3-րդ մասի 1-ին կետի, 34-235-րդ հոդվածի 3-րդ մասի հատկանիշներով:










