Կեմերովոյում հրդեհված առևտրի կենտրոնում հրդեհի տագնապի ազդանշանը չի աշխատել մարտի 19-ից. ՌԴ ՔԿ
Ռուսաստանի Դաշնության Կեմերովո քաղաքի «Զիմնյայա վիշնյա» առևտրի կենտրոնում, որտեղ մարտի 25-ին խոշոր հրդեհ էր բռնկվել, հրդեհի տագնապի ազդանշանը չի աշխատել մարտի 19-ից, ու որևէ մեկը չի զբաղվել դրա նորոգմամբ:
Ինչպես նշում է ria.ru-ն, այս մասին հայտարարել է ՌԴ Քննչական կոմիտեի նախագահ Ալեքսանդր Բաստրիկինը:
«Ամսի 19-ից նրանց մոտ հրդեհի տագնապի ազդանշանը չի աշխատել, և ոչ ոք դրա նորոգմամբ չի զբաղվել»,-ՌԴ նախագահ Վլադիմիր Պուտինի մասնակցությամբ խորհրդակցության ժամանակ ասել է Բաստրիկինը:
Միևնույն ժամանակ, պաշտոնյան հավելել է, որ առևտրի կենտրոնի անվտանգության աշխատակիցը հրդեհի բռնկումից հետո չի միացրել ահազանգի ծանուցման համակարգը, որը սարքին է եղել:
«Մենք չենք կարող սրան խելամիտ բացատրություն տալ, սա ինչ-որ անպատրաստ մարդ է»,-շարունակել է Բաստրիկինը:
Հիշեցնենք, որ Ռուսաստանի Դաշնության նախագահ Վլադիմիր Պուտինը ժամանել է Կեմերովո քաղաք ու հրդեհի առնչությամբ խորհրդակցություն է անցկացրել:
Խոսելով բազմաթիվ երեխաների կյանք խլած ողբերգության մասին՝ Պուտինն ասել է, որ կատարվածի պատճառը «հանցավոր անփութությունն» է ու «թափթփվածությունը»:
«Ի՞նչ է մեզ մոտ կատարվում: Չէ՞ որ սրանք ռազմական գործողություններ չեն, կամ հանքավայրում մեթանի հանկարծակի արտանետում»,-ասել է Պուտինը Կեմերովոյում կայացած խորհրդակցության ժամանակ:
«Մարդիկ, երեխաները եկել էին հանգստանալու: Մենք խոսում ենք ժողովրդագրության մասին, բայց այսքան երեխա ենք կորցրել՝ ինչի՞ պատճառով. հանցավոր անփութության, թափթփվածության»,-ասել է Պուտինը:










