Հրապարակվել է Կեմերովոյի առևտրի կենտրոնում տեղի ունեցած հրդեհի հետևանքով անհետ կորած և զոհված անձանց ցանկը

16:29 • 27.03.18

Կեմերովոյի քաղաքապետարանը հրապարակել է «Զիմնյայա վիշնյա» առևտրի կենտրոնում տեղի ունեցած հրդեհի հետևանքով անհետ կորած և զոհված անձանց ցանկը, հայտնում է lenta.ru-ն:

Անհետ կորածների ցանկում ներառված է 38 մարդու, այդ թվում՝ 26 երեխայի անուն, երկու անձի ծննդյան տարեթվերը նշված չեն:


Քաղաքապետարանի կայքում հրապարակվել են նաև զոհերից 25-ի ազգանունները, որոնց ինքնությունը ճշտվել է:

«Интерфакс» գործակալության աղբյուրը հայտնում է, որ առևտրի կենտրոնում որոնողական գործողությունն ավարտվել է:

Meduza.io-ն հայտնում է, որ հրդեհի զոհերի հարազատների ստեղծած շտաբում հավաքվել են 85 անհետ կորածի մասին տվյալներ:

«Տվյալները ստացվել են անձամբ, փոստով կամ SMS-ով: Ազգանունները չեն կրկնվում: Անհետ կորածների 70 տոկոսը երեխաներ են, միջին տարիքը՝ 10-13 տարեկան»,- հայտնել է շտաբի ներկայացուցիչը:

Հիշեցնենք, որ Ռուսաստանի Դաշնության Կեմերովո քաղաքի «Զիմնյայա վիշնյա» 4-հարկանի առևտրի կենտրոնում մարտի 25-ին տեղի ունեցած խոշոր հրդեհի ժամանակ զոհվել է 64 մարդ, այդ թվում՝ 41 երեխա: