ԻՊ-ի պարտությունը նշանակում է ԱՄՆ-ի տարածաշրջանային քաղաքականության տապալում. Իրանի պաշտպանության նախարար
ԱՄՆ-ն խուսափում է իր անխոհեմ քաղաքականության համար պատասխանատվությունից, «Իսլամական պետություն» ահաբեկչական խմբավորման պարտությունը նշանակում է ԱՄՆ-ի տարածաշրջանային քաղաքականության տապալում: Նման կարծիք է հայտնել Իրանի պաշտպանության նախարար Ամիր Հաթամին Մոսկվայում, հայտնում է «ՌԻԱ Նովոստի»-ն:
«ԻՊ-ի պարտությունը նշանակում է ԱՄՆ-ի տարածաշրջանային քաղաքականության տապալում: Գոյություն ունի շատ ամուր կարծիք, որ այդ պարտությունը սկիզբ կդնի տարածաշրջանում բռնության և լարվածության նոր փուլի՝ գոյություն ունեցող վակուումը լրացնելու համար»,- հայտարարել է նա Մոսկվայի միջազգային անվտանգության հարցերով համաժողովի ժամանակ ունեցած ելույթի ընթացքում:
Նախարարի խոսքով՝ ԱՄՆ կառավարությունը դեռ իր «եսասիրական շահերն է դնում իր արտաքին քաղաքականության հիմքում և շարունակում է խուսափել միջազգային ասպարեզում իր անխոհեմ քաղաքականության համար պատասխանատվությունից»:
Իրանի պաշտպանության նախարարը նաև հայտարարել է, որ «Իսլամական պետություն» ահաբեկչական խմբավորման ենթակառուցվածքները ոչնչացվել են, բայց ծայրահեղականությունն արմատախիլ անելուն դեռ շատ կա:
Ավելի վաղ հաղորդվել էր, որ Միացյալ Նահանգների նախագահ Դոնալդ Թրամփն ու Իսրայելի վարչապետ Բինյամին Նեթանյահուն հեռախոսազրույցի ժամանակ քննարկել են Մերձավոր Արևելքում տիրող իրավիճակը:
«Երկու առաջնորդները որոշել են շարունակել սերտ համակարգումը՝ Իրանի կործանիչ ազդեցությանն ու այդ երկրի ապակայունացնող գործողություններին դիմակայելու համար»,-նշվել է Սպիտակ տան՝ հեռախոսազրույցի վերաբերյալ տարածած հաղորդագրությունում:










