Տեսել եմ սփյուռքի «սուպեր նախարարություն» ունենալու ռեալ հնարավորություններ, սակայն կառավարությունն այլ մոտեցում ունեցավ, և այն ընդունելի է. Մխիթար Հայրապետյան (տեսանյութ)

Մենք, մի շարք սփյուռքագետների հետ խորհրդակցելով, քննարկելով, առաջ էինք քաշել սփյուռքի հետ քաղաքականության ռազմավարության հայեցակարգ կամ սևագիր, որի հիման վրա, պատկերացում ունեինք՝ քննարկումների նոր մակարդակ բարձրացնել և ավելի ուժեղ փաստաթուղթ ներկայացնել:

Tert.am-ի հետ զրույցում այս մասին ասաց ԱԺ կրթության, մշակույթի, սփյուռքի, երիտասարդության և սպորտի մշտական հանձնաժողովի նախագահ, սփյուռքի նախկին նախարար Մխիթար Հայրապետյանը՝ ներկայացնելով սփյուռքի նախարարության լուծարման մասին իր կարծիքը:

«Այդ հայեցակարգի հիմքում ընկած էր սփյուռքի նախարարության հզորացումը, այսինքն՝ սփյուռքի նախարարությանը նոր գործառույթ, նոր լծակները տալը: Որովհետև ինքս, 8 ամիս լինելով գործադիրում, և կատարելով նախարարի լիազորությունները, եկա այն համոզման, որ ցավոք սրտի, այդ կառույցն ավելի շատ խորհրդանշական բնույթ է կրում և մեծ հաշվով քաղաքականությունների վրա ազդեցություն ունենալու համար չունի համապատասխան լծակներ»,- ասաց նա՝ նկատելով, որ կային առանձին գերատեսչություններ, որոնք առանձին իրենց օղակներով էին մշակում և իրականցնում սփյուռքի հետ քաղաքականությունը, հետևաբար «մեկ պատուհանի» սկզբունքը, որն ի սկզբանե դրված էր նախարարության առաջ, չէր գործում:

Մխիթար Հայրապետյանը հիշատակեց, որ ինքը բացմիցս հայտարարել է, որ եթե կառույցը պետք է կրի բացառապես խորհրդանշական բնույթ, ապա կարող է այն չլինել նաև:

«Մյուս կողմից տեսնում էի հնարավորություն «սուպեր նախարարություն» ունենալու: Բայց նաև սրանով ենք մենք՝ նոր քաղաքական թիմը, աչքի ընկնում տեսակետների տարբերությունների, այլակարծության և դրանց մասին բարձրաձայն խոսելու, և հաղթում են այն տեսակետները, որոնք ավելի փաստարկված են, կամ տվյալ պարագայում առավել նպատակահարմար են,- ասաց նա, ապա հավելեց,- ես չեմ կարող այսօր կանգնել և ասել, որ մշտապես հանդես եմ եկել նախարարությունը փակելու դիրքերից, որովհետև ես ուղղակիորեն կստեմ»:

Մխիթար Հայրապետյանի խոսքով՝ ինքն ունեցել է իր պատկերացումները, տեսել է ռեալ հնարավորություններ «սուպեր նախարարություն» ունենալու, սակայն նոր կառավարությունն այլ մոտեցում ունեցավ․ «Եվ դա ևս ընդունելի տարբերակ է․ այն է՝ ունենալ մեկ գրասենյակ՝ վարչապետի ենթակայության տակ, որը համակարգողի գործառույթ է իրականացնելու, և բոլոր գերատեսչություններն իրականացնելու են քաղաքականությունը սփյուռքի հետ»,- ասաց նա։

Մանրամասները՝ տեսանյութում: