Destiny's Child խմբի սպասված վերամիավորումը տեղի կունենա առնվազն 3 տարի անց. խմբի նախկին մենեջեր (լուսանկարներ)

Չնայած նրան, որ վերջերս լուրեր էին շրջանառվում, որ Բեյոնսեն, Քելի Ռոուլենդն ու Միշել Ուիլյամսը բանակցություններ են վարում 2020 թվականին վերամիավորման և համատեղ շրջագայության վերաբերյալ, Բեյոնսեի հայրը՝ խմբի նախկին մենեջեր Մեթյու Նոուլզը հայտարարել է, որ ձայնասկավառակի և վերամիավորման պատրաստությունների համար առնվազն 3 տարի կպահանջվի, գրում է msn.com-ը:

Պատասխանելով Destiny's Child խմբի վերամիավորման վերաբերյալ հարցին՝ Մեթյու Նոուլզն ասել է. «Ես լիահույս եմ, որ այդպես էլ կլինի: Սակայն նման բաները տարիների պատրաստություն և պլանավորում են պահանջում: Տարիներ են անհրաժեշտ շրջագայությունը կազմակերպելու, խումբը վերամիավորելու, պարողներին հավաքելու համար, իսկ հետո պետք է ծրագրել, թե ինչ մեծության են լինելու մենահամերգները, սկսել դրանց փորձերը…Այս ամենի համար երկուսից երեք տարի կպահանջվի»:

Խմբի նախկին մենեջերի խոսքով՝ վերամիավորումն ավելի քան հնարավոր է, քանի որ եռյակի ընկերությունը տարիների ընթացքում ավելի է ամրապնդվել:

«Տարիքը դառնում է գործոն, ժամանակը դառնում է գործոն, երաժշտական միջավայրը դառնում է գործոն: Բազմաթիվ գործոններ կան, որոնք կարող են այս գաղափարը հրաշալի դարձնել»,- հայտնել է Մեթյու Նոուլզը:

Աղբյուրի տեղեկություններով՝ Բեյոնսեն չափազանց ոգևորված է խմբի վերամիավորման առիթով, մասնավորապես՝ Spice Girls խմբի շրջագայությունից հետո:

Երգչուհուն մոտ աղբյուրների պնդմամբ՝ Բեյոնսեն վերամիավորման համար ավելի լավ տարեթիվ չի պատկերացնում, քան 2020 թվականն է, քանի որ այդ տարեթվով կնշանավորվի խմբի 20-ամյակը:

Նշենք, որ խումբը բաժանվել էր 2006 թվականին: 2018 թվականին երգչուհիները վերամիավորվել էին «Քոաչելա» ամենամյա երաժշտական փառատոնի շրջանակում: