Իշխանություններն անհամաչափ սահմանափակումներ են մտցրել, խաղաղ հավաքների արգելանքն օգտագործում են քաղաքական հաշվեհարդարներ տեսնելու համար. Ավետիք Իշխանյան (տեսանյութ)

12:07 • 17.06.20

ՀՀ իշխանությունները արտակագ դրության ժամանակ ավելորդ անհամաչափ սահմանափակումներ են մտցրել, խաղաղ հավաքների արգելանքն օգտագործում են հակառակորդներին ճնշելու, քաղաքական հաշվեհարդարներ տեսնելու համար:

Այս մասին «Պոլիտէկոնոմիա» հետազոտական ինստիտուտի նախաձեռնած «Կորոնավիրուսային ճգնաժամը, դրա հումանիտար և սոցիալ–տնտեսական հետևանքները․ գնահատականներ և լուծումներ» խորագրով քննարկմանը հայտարարեց իրավապաշտպան Ավետիք Իշխանյանը:

Նա ընդգծեց՝ սահմանափակումների մեղմացումների հետ մեկտեղ մնում է մի սահմանափակում՝ խաղաղ հավաքների սահմանափակումը:

«Խաղաղ հավաքների անցկացման իրավունքը՝ որպես մարդու իրավունք, համարվում է իրավունքի թագուհիներից մեկը, որովհետև իր մեջ ներառում է խոսքի ազատության ու բողոքի և այլ իրավունքներ: Այս ընթացքում խաղաղ հավաքների իրավունքը արգելափակելով՝ սկսվեցին քաղաքական ռեպրեսիաներ, դա վստահաբար եմ ասում: Ստացվում է՝ մարդու դեմ կարող ենք քրեական գործ հարուցել, ձերբակալել, կալանավորել, բայց նրանք բողոքելու իրավունք չունեն»,-նշեց նա՝ ընդգծելով, թե առնվազն երեք անձ բերման է ենթարկվել՝ միայնակ բողոքելով, ինչը հավաք չէ:

Իրավապաշտպանը ներկայացրեց ՄԱԿ-ի խաղաղ հավաքների և միավորումների զեկուցող հանձնակատարի՝ կորոնավիրուսի պայմաններում ՄԱԿ անդամ պետությունների համար խորհրդատվական բնույթ ունեցող զեկույցը՝ համեմատական անցկացնելով ՀՀ-ում տիրող իրավիճակի հետ:

Նա ասաց, թե այդ զեկույցի համաձայն, արտակարգ պայմաններում կարևոր սկզբունքներից են՝ անընդունելի են մարդու իրավունքների լրիվ սահմանափակումները։

Իշխանության ցանկացած որոշում պետք է ունենա անկախ քաղհասարակության կողմից գնահատական, որ այդ օրենքները իշխանության ձեռքում չլինեն ընդդիմության դեմ օգտագործելու մահակ, չպետք է սահմանափակվի խաղաղ հավաքների իրավունքը, պետք է պահպանվեն դատական ու օրենսդիր իշխանությունների հակակշիռները, չսահմանափակվի լրագրողների աշխատանքը, թույլ տան գործադուլ անել, եթե մարդկանց աշխատանքային իրավունքները խախտված են, «կեղծ լուրեր» անվան տակ չսահմանափակել մարդկանց կարծիքի իրավունքը:

«Կարծես թե այս ամենն ուղղված է ՀՀ իշխանություններին, որոնք ավելորդ անհամաչափ սահմանափակումներ են մտցրել, խաղաղ հավաքների արգելանքն օգտագործում են հակառակորդներին ճնշելու, քաղաքական հաշվեհարդարներ տեսնելու համար:

Ոստիկանական ուժերով խաղաղ հավաքների արգելումը, իմ կարծիքով, ավելի է սաստկացնում համավարակի տարածումը, որովհետև, եթե ոստիկանները չխառնվեն, մարդիկ իրարից բավական հեռավարության վրա իրենց բողոքը կարտահայտեն, կգնան, իսկ Ոստիկանությունը հրահրում է վարակի տարածումը»,-ասաց նա՝ կարևորելով նաև տուգանքների համաչափ լինելը: