«Անթույլատրելի է, որ որոշ մարդիկ տարբեր պատրվակներով Սիրիայից և այլ վայրերից ահաբեկիչներ բերեն Իրանի սահմանների մոտ»․ Ռոհանի
Իրանի Իսլամական Հանրապետության նախագահ Հասան Ռոհանին, այսօր ելույթ ունենալով նախարարների կաբինետի ամենշաբաթյա նիստում, հայտարարել է, որ Իրանը տարիներ շարունակ պայքար է մղել հարևան երկրներում ահաբեկիչների դեմ, որպեսզի նրանց հեռու պահի իր սահմաններից, գրում է Tasnim News Agency-ն։
«Տարիներ շարունակ մենք պայքարել ենք ահաբեկիչների դեմ և նրանց հետ մղել մեր սահմաններից: Այնպիսի մարդիկ, ինչպիսին նահատակ Սոլեյմանին է, եղել են այդ երկրներում և պայքարել նրանց դեմ, որպեսզի հենց այնտեղ սպանեն ահաբեկիչներին, և թույլ չտան նրանց մոտենալ մեր սահմաններին: Մենք Սիրիայում, Լիբանանում և Իրաքում ահաբեկիչների դեմ պայքարել ենք նրանց ժողովրդի օգնությամբ։ Անթույլատրելի է, որ որոշ մարդիկ տարբեր պատրվակներով ցանկանան ահաբեկիչներին Սիրիայից և այլ վայրերից բերել Իրանի սահմանների մոտ գտնվող շրջաններ, և մենք այդ կապակցությամբ մեր դիրքորոշման մասին ուղղակիորեն տեղեկացրել ենք ինչպես Ադրբեջանի Հանրապետության, այնպես էլ Հայաստանի Հանրապետության պաշտոնական անձանց»,- հայտարարել նա։
Հասան Ռոհանին ընդգծել է, որ անհրաժեշտ է գործադրել բոլոր ջանքերը, որպեսզի հայ-ադրբեջանական հակամարտությունը չվերածվի տարածաշրջանային պատերազմի և երրորդ կողմերին զգուշացրել է ռազմական գործողություններ հրահրելուց:
Իրանի նախագահը նաև հավելել է, որ ԼՂ-ում լարվածության ֆոնին Իրանի սահմանների անվտանգությունը պետք է պահպանվի։
Նա ափսոսանք է հայտնել շարունակվող պատերազմի կապակցությամբ՝ կոչ անելով դադարեցնել մարտական գործողությունները։
Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։
Հոկտեմբերի 7-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 126 անօդաչու թռչող սարք, 379 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, մեկ «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:
Հակառակորդն ունի ավելի քան 3454 զոհ, ավելի քան 5270 վիրավոր։ Հայկական կողմից, նախնական տվյալներով, կա 291 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում վիրավորվել է 80 քաղաքացիական անձ, զոհվել՝ 19 մարդ, վնասվել՝ մոտ 2700 գույք ու ենթակառուցվածք։
Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։










