Մեր քաղաքացիները հոյակապ գիտեն, թե ով է փորձում իր քաղաքական շահերն այս պատերազմի շնորհիվ առաջ տանել. Ալեն Սիմոնյանը՝ Փաշինյանի՝ հող հանձնելու լուրերի մասին
Ադրբեջանի նախագահ Իլհամ Ալիևի այն հայտարարությունը, թե Նիկոլ Փաշինյանի հետ բանակցությունները դադարել են այն ժամանակից, երբ նա հայտարարել է՝ Արցախը Հայաստան է և վերջ, իսկ նախորդ իշխանության հետ բանակցությունների փուլում առաջընթաց են ունեցել, նշանակում է, որ նախորդ իշխանությունը չի բացառել տարածքների վերադարձը և դա շատ հարմար է եղել Իլհամ Ալիևին: Այս մասին այսօր լրագրողների հետ զրույցում ասաց ԱԺ փոխնախագահ Ալեն Սիմոնյանը:
«Այս մասին շատ է խոսվել, այս մասին իր հարցազրույցում ասել է նաև Սերժ Սարգսյանը և հայ ժողովուրդը պետք է ուրախ լինի, որ Ալիևի համար Նիկոլ Փաշինյանը հարմար բանակցող չէ, որովհետև Փաշինյանը ներկայացրել և ներկայացնում է հայ ժողովրդի շահերն ու հարմարությունները»,-ասաց նա:
Նա նշեց, որ Կառավարության և Խորհրդարանի կողմից ապահովվում է ռազմաճակատի դիվանագիտական մասը, որը հաջողել է, քանի որ որոշ երկրներ չեն թաքցնում իրենց համակրանքը, իսկ Եվրոպայի խորհրդի պաշտոնյաների ելույթները բոլորը դրական են հօգուտ Հայաստանի, բայց վաղ է խոսել բանակցությունների սեղան վերադառնալու մասին, սակայն միակողմանի զիջումների մասին որևէ քննարկում չկա:
Խոսելով վարչապետի այն գրառման մասին, թե առաջնագծում որոշ անձինք տարածել են տեղեկություն, թե Նիկոլ Փաշինյանը հողերը հանձնել է և այս պատերազմը պարզապես մսաղաց է, Ալեն Սիմոնյանը նշեց, որ այս պահին չի կարող մեկնաբանել, սակայն այս պահին ընթացող քննության արդյունքում հստակ անուններ կիմանանք, հստակ գործողություններ կլինեն:
«Մեր քաղաքացիները հոյակապ գիտեն՝ ինչի մասին է խոսքը, ում մասին է խոսքը, ով է փորձում իր մանր, անձնական և քաղաքական շահերն այստեղ, այս պատերազմի շնորհիվ տաքացնել և առաջ տանել: Այսօր երևում է, որ թե՛ ԼՀԿ-ի, թե՛ ԲՀԿ-ի հետ միասնականություն կա, բայց կան մարդիկ, որ փորձում են և փորձելու են իրենց շահերն առաջ տանել»,-նշեց նա։
Ալեն Սիմոնյանը չմեկնաբանեց, թե ինչ հիմքերով է աշխատանքից ազատվել ԱԱԾ տնօրենը և ասաց, որ չի կարող շեշտել, թե կապ կա վարչապետի գրառման հետ: Ներկա պատերազմական իրողության մասին Ալեն Սիմոնյանը նշեց, որ այս պայքարն արդեն հաղթանակ է, իսկ հակառակորդի ներկայացրած ինֆորմացիաները ոչ միշտ են ճիշտ, քանի որ մեկ լուսանկարի համար ադրբեջանական կողմը առաջ է գալիս, հետո կրկին հետ շպրտվում:










