«Այժմ դիտարկվում է Արցախում վիրավորված ռուս լրագրողներին հայրենիք վերադարձնելու հնարավորությունը»․ ՀՀ-ում ՌԴ դեսպան

18:05 • 09.10.20

Հայաստանում Ռուսաստանի դեսպան Սերգեյ Կոպիրկինը ռուսական Աառաջին ալիքին հայտնել է, որ ԼՂ Շուշի քաղաքում ադրբեջանական ագրեսիայի հետևանքով վիրավորված ռուս լրագրողներն անհրաժեշտ բուժօգնություն են ստացել, այժմ նրանց Ռուսաստան ուղարկելու հարցն է քննարկվում, գրում է ՏԱՍՍ գործակալությունը։

«Վիրավորված լրագրողին հաջողությամբ վիրահատել են, նրա մյուս երկու գործընկերները, որոնք ոչ պակաս ծանր վիրավորում էին ստացել, նույնպես անհրաժեշտ բուժօգնություն են ստացել։ Այժմ դիտարկվում է նրանց հայրենիք վերադարձնելու հարցը»,- նշել է նա։

Ավելի վաղ ՀՀ արտգործնախարարությունը հայտնել էր վիրավորում ստացած երեք լրագրողների մասին: Հայտնի է, որ նրանցից մեկը՝ ռուս բլոգեր Յուրի Կոտենոկը, գտնվում է ծանր վիճակում: Նշվում է, որ վիրավորներից մեկն էլ «Ռուսաստանի սպաներ» պորտալի թղթակից Լևոն Արզանովն է:

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 9-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 162 անօդաչու թռչող սարք, 508 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4369 զոհ։ Հայկական կողմից, նախնական տվյալներով, կա 387 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։