ԼՂ հակամարտության սրման հետևանքով առնվազն 53 խաղաղ զոհ կա, ավերված շինությունների մեծ մասը գտնվում է ԼՂ տարածքում. ՄԱԿ

17:35 • 09.10.20

ՄԱԿ-ի Մարդու իրավունքների հարցերով գերագույն հանձնակատար Միշել Բաչելետը հայտարարել է, որ Լեռնային Ղարաբաղի հակամարտության գոտում իրավիճակի սրացման ֆոնին զոհվել է առնվազն 53 խաղաղ բնակիչ, այդ թվում՝ երեխաներ: Բացի այդ, փլուզվել են բազմաթիվ շինություններ, այդ թվում՝ տներ, դպրոցներ, քաղաքացիական այլ օբյեկտներ:

Ինչպես նշում է ohchr.org կայքը, հանձնակատարի գրասենյակում ընդգծել են, որ ավերված շինությունների մեծ մասը գտնվում է ԼՂ տարածքում:

«Խոր անհանգստություն է առաջացնում այն փաստը, որ վերջին օրերին ականատես ենք լինում՝ ինչպես են բնակավայրերը դառնում թիրախ և հրետակոծվում ծանր զինատեսակներից»,-նշել է հանձնակատարը:

Բացի այդ, պաշտոնյան ուշադրություն է հրավիրել խոր անհանգստություն առաջացնելող տեղեկություններին առ այն, որ հակամարտության գոտում կասետային ռազմամթերք է կիրառվել:

«Կասետային ռազմամթերքը լայն շառավիղով տարածքներում գցում են ոչ մեծ ռումբերը: Դրանցից շատերը կարող են սպանել և վնասվածքներ հասցնել տարիների ընթացքում: Նման ռազմամթերքի կիրառումը պետք է անհապաղ դադարեցվի»,-ասել է Բաչալետը:

Ավելի վաղ Բաչելետը Լեռնային Ղարաբաղի հակամարտող կողմերին կոչ է արել պահպանել մարդասիրական իրավունքը և թույլ չտալ, որպեսզի  քաղաքացիական բնակչությանն ու ենթակառուցվածքներին վնաս հասցվի: 

«Հակամարտության կողմերին հիշեցնում եմ, որ պետք է հետևեն քաղաքացիական անձանց և ենթակառուցվածքների պաշպանության մասին մարդասիրական իրավունքի համաձայն իրենց ստանձնած պարտավորություններին»,- ասվում է Բաչելետ հայտարարությունում։

Հիշեցնենք, որ սեպտեմբերի 27-ին Ադրբեջանի զինուժը լայնածավալ հարձակում է սկսել Արցախում՝ թիրախավորելով նաև խաղաղ բնակչությանը։

Հոկտեմբերի 9-ի դրությամբ Արցախի զինուժը խոցել է հակառակորդի՝ 16 ուղղաթիռ, 17 ինքնաթիռ, 162 անօդաչու թռչող սարք, 508 միավոր զրահատեխնիկա, հիմնականում տանկեր, 82 ավտոտրանսպորտ, 10 զրահափոխադրիչ, 4 «ՏՕՍ-1Ա» ծանր հրանետային համակարգ, 4 «Սմերչ» և 1 «Ուրագան» տիպի համազարկային կրակի ռեակտիվ կայանքներ:

Հակառակորդն ունի ավելի քան 4369 զոհ։ Հայկական կողմից, նախնական տվյալներով, կա 387 զոհ։ Ադրբեջանի զինված ուժերը թիրախավորել է նաև Արցախի և Հայաստանի Հանրապետության զինվորական և քաղաքացիական ենթակառուցվածքները, որի հետևանքով Գեղարքունիքում սպանվել է 2 քաղաքացիական անձ, Արցախում սպանվել է 20 քաղաքացիական անձ, վիրավորվել է 93 քաղաքացիական անձ, վնասվել՝ մոտ 5800 գույք ու ենթակառուցվածք։

Ադրբեջանական զինուժի հրետակոծության հետևանքով վիրավորվել են ինչպես արտասահմանյան, այնպես էլ տեղական լրատվամիջոցների լրագրողներ։ Հայաստանում և Արցախում սեպտեմբերի 27-ին հայտարարվել է ռազմական դրություն։