Տիգրան Մուրադյանը թավջութակի իր կատարումները կնվիրի Սպիվակովի հիմնադրամի հոբելյանին

Փետրվարի 28-ին Մոսկվայի Ն.Կ.Ռերիխի անվան միջազգային կենտրոն-թանգարանում տեղի կունենա համերգ՝ նվիրված Վլադիմիր Սպիվակովի Միջազգային բարեգործական հիմնադրամի 15-ամյակին։ Համերգին ելույթ կունենա երիտասարդ հայ թավջութակահար, միջազգային մրցույթների դափնեկիր, ՅՈՒՆԵՍԿՕ-ի «Աշխարհի երաժիշտ» տիտղոսակիր Տիգրան Մուրադյանը։ Այս մասին հաղորդում է Личные деньги կայքը։

Երիտասարդ երաժիշտը նվիրում է իր կատարումները Սպիվակովի հիմնադրամի հոբելյանին։ 1999թ. Սպիվակովի հիմնադրամը Հայաստանում հայտնաբերել է 13-ամյա տաղանդավոր թավջութակահարին, կրթաթոշակ է նշանակել, ֆինանսավորել նրա մասնակցությունը վարպետության դասերին, փառատոններին և հատուկ Մուրադյանի համար պատվիրել թավջութակ ֆրանսիացի վարպետ Ալան Կարբոնարի մոտ։

Տիգրան Մուրադյանը Մոսկվայի կոնսերվատորիայի ասպիրանտ է, բազմաթիվ մրցույթների և փառատոնների դափնեկիր։