Գավառամտությունը ոչ թե տեղանքով է պայմանավորված, այլ մտածելակերպով. արվեստագետ

Թատրոնը չի կարող չարձագանքել հասարակությունում կատարվող գործընթացներին՝ լինի դա հասարակական, բարոյահոգեբանական, թե սոցիալական։ Հաճախ երբ մենք խոսում ենք հասարակությունում տեղի ունեցող գործընթացների մասին, այդ ամենը սահմանափակում ենք զուտ քաղաքական ենթատեսքստով` մոռանալով, որ պետք չէ նեղացնել շրջանակը: Այս մասին Tert.am-ի հետ զրույցում ասաց Հովհաննես Թումանյանի անվան տիկնիկային թատրոնի գեղարվեստական ղեկավար, «Թատրոն X» փառատոնի գեղարվեստական ղեկավար Ռուբեն Բաբայանը։

«Այն, ինչով ապրում է մարդը, միայն զուտ քաղաքական չէ»,- ասաց Բաբայանը՝ ուրախությամբ նշելով «Թատրոն X»-ի՝ հասարակություն-թատրոն կապի ակտիվացմանն ուղղված քայլերն ու ձևի փնտրտուքը։

«Փառատոնում առաջին օրվանից դրված էր հետևյալ գաղափարը: Ներկայացումից հետո այն հանդիսատեսը, որը ցանկություն ունի, մնում է թատրոնում, և թատերագետների հետ սկսվում է բաց խոսակցություն ներկայացման մասին: Եվ այստեղ մենք չենք տարանջատում պրոֆեսիոնալ և ոչ պրոֆեսիոնալ խոսակցությունները»,- ասաց նա՝ կարևորելով այդ քննարկումները։ Եթե արվեստագետը չի լսում կողքից կարծիք, որն անպայման չէ, որ լինի պարտադիր մասնագիտական, համոզված է փառատոնի գեղարվեստական ղեկավարը, նա սկսում է ճահճանալ:

«Ստեղծագործել կարող են միայն այն մարդիկ, որոնք իրենցից ներկայացնում են բաց համակարգ` բաց են նորությունների, քննադատությունների, աշխարհի հետ շփվելու համար»,- ասաց նա՝ փառատոնի շրջանակում արձանագրելով մեկ առաջընթաց, այն է՝ «բանավեճի մշակույթը», որը տեղի է ունենում նաև մարզերում ու ԼՂՀ-ում: «Կարողանալ լսել ուրիշներին` նույնիսկ չհամաձայնելով ուրիշի կարծիքին, բայց հարգել այն, բանավեճի մշակույթ է, որը ձեռք է բերվում կյանքի, նման քննարկումների ընթացքում»,- ասաց Բաբայանը՝ տեղեկացնելով, որ երկրորդ տարին է, ինչ քննարկումներն անցկացվում են մարզերում։

«Այդ քննարկումներից հետո հաջորդ տարի տեսնում ես, որ թատրոնները փորձում են այլ արտահայտչամիջոցներ գտնել, որովհետև, ի վերջո, գավառամտությունը ոչ թե տեղանքով է պայմանավորված, այլ մտածելակերպով»,- համոզված է Բաբայանը: