Բռնությունը մերժվեց պարերով (տեսանյութ)

Շառլ Ազնավուրի անվան հրապարակում երեկ երեկոյան «Կանանց իրավունքների» կենտրոնի նախաձեռնությամբ «Միհր» թատրոնի մասնագետները պարային շարժումներով ու ժեստերով անցորդներին ու հրապարակում հավաքված մարդկանց ներկայացրեցին կանանց նկատմամբ կիրառվող բռնության մասին պար-ներկայացում:

Լռությամբ, միայն պարային շարժումներով բռնության մասին խոսելու գաղափարը նոր ու յուրօրինակ մոտեցում էր վերջին շրջանում անընդհատ խոսվող բռնությունների ու կանանց իրավունքների մասին իրազեկության գործում: «Սա, իհարկե, փոքրիկ կաթիլ է այդ մեծ խնդրի լուծման գործում, բայց պետք չէ մոռանալ, որ փոքր կաթիլներից է բաղկացած ծովը»,- նշեց «Կանանց իրավունքների» կենտրոնի տնօրեն Սուսաննա Վարդանյանը հավատալով, որ եթե անգամ անցորդներից մի քանիսի համար էլ պարզ դառնա խնդրի էությունը, ուրեմն նախաձեռնությունը կարելի է հաջողված համարել: «Միհր» պարային թատրոնի մասնակիցներին իրենց շարժումներով սկզբում պատկերեցին ընտանեկան բռնության տեսարաններ: Պարը, սակայն, ավարտվեց հաշտությամբ, և համատեղ ուժերով սպիտակ պաստառի վրա գրվեց «Ո’չ» ընտանեկան բռնությանը: