Նունե Եսայանը ստամբուլյան համերգից առաջ խաղաղության կոչ է արել

Նունե Եսայանն այսօր համերգ կունենա Ստամբուլում: 
 

Համերգից առաջ Hurriyet daily-ին տված հարցազրույցում Նունե Եսայանը բարեկամության «մեսիջ» է հղել:
 

«Այո, սահմանը քաղաքական նկատառումներով փակ է, բայց մեր սրտերն են բաց: Ես չեմ հավատում, որ երաժշտությունը կարող է սահմաններ ունենալ»,- ասել է նա:
 

Երգչուհին Ստամբուլում կմնա ևս 4 օր: Նա նշել է, որ ամենից շատ ցանկանում է տեսնել Այա Սոֆիայի տաճարը և Թոփքափըյի պալատը:
 

Նա հիշեցրել է, որ Ստամբուլում նման համերգ կազմակերպելը եղել է սպանված լրագրող Հրանտ Դինքի մեծագույն երազանքներից մեկը:

«Ես Ստամբուլում եմ` իրագործելու այդ երազանքը: Հայերը Ցեղասպանությունից մնացած մեծ սպիներ ունեն, սակայն դա մեզ չի խանգարում նայել ապագային»,- ասել է նա:

Նունե Եսայանը նաև հետաքրքրված է թուրք արվեստագետների հետ համատեղ համերգ կազմակերպելու գաղափարով, որն ուղղված կլինի «խաղաղ ապագային», և ճիշտ հաղթանակ» կնշանակի:
 

Երգչուհին ասել է, որ տարիներ առաջ ինքը հրեական համայնքից թուրք հանրահայտ երգչուհի Հուլիա Ավշարի հետ համատեղ համերգով հանդես գալու առաջարկ է ստացել, սակայն մերժել է. «Իհարկե, ես կցանկանայի մասնակցել նման համերգի, բայց ինչո՞ւ հրեական համայնքը պետք է միջնորդ հանդիսանա երկու հարևան երկրների` Հայաստանի և Թուրքիայի միջև: Դա ինձ համար անընդունելի էր: Ես կարծում եմ, որ մենք միջնորդների կարիք չունենք»,- ասել է նա: