Կայացել է «Նոր անուններ» 2-րդ միջազգային փառատոնի բացումը

Այսօր կայացել է «Նոր անուններ» պատանի երաժիշտ-կատարողների 2-րդ միջազգային փառատոնի բացումը, որի գլխավոր հովանավորը, արդեն երկրորդ տարին, «ՎիվաՍել-ՄՏՍ»-ն է:


Ինչպես տեղեկացնում է «ՎիվաՍել-ՄՏՍ»-ի լրատվական ծառայությունը, փառատոնի բացման արարողության ժամանակ ելույթով հանդես է եկել ընկերության գլխավոր տնօրեն Ռալֆ Յիրիկյանը։


«Արվեստում կարևոր է առնչումը նոր երևույթի, նոր անունների հետ: Հովանավորելով «Նոր անուններ» փառատոնը` «ՎիվաՍել-ՄՏՍ»-ը վերահաստատում է իր մտադրությունն ու հաստատակամությունը` օգնել պատանի հայ կատարողներին, խրախուսել նրանց աշխատասիրությունը, սերն ու նվիրումն արվեստին»,– ասել է նա:


«Փառատոնը թույլ է տալիս բեմը տրամադրել պատանիներին` նրանց կատարողական հնարավորություններն ու կարողությունները բացահայտելու և զարգացնելու համար: Դա հատկապես կարևոր է կատարողական արվեստում, որտեղ նորն արագ ու հեշտ չի ձևավորվում: Դրա համար տարիներ են պետք, մեծ ու քրտնաջան աշխատանք: Պետք է հուսալ, որ այս պատանիներից մի քանիսը կկարողանան ապագայում անշրջելի էջեր գրել արվեստի պատմության մեջ»,– ավելացրել է նա:


«Հայաստանի նոր անուններ» ծրագիրը (ղեկավար` «Մշակույթի գործիչների ընկերակցության» նախագահ, ՀՀ մշակույթի վաստակավոր գործիչ Սիլվա Մեքինյան) ՀՀ մշակույթի նախարարության աջակցությամբ 2012թ. մայիսի 29-ից հունիսի 1-ը Երևանում կիրականացնի «Նոր անուններ» պատանի երաժիշտ-կատարողների 2-րդ միջազգային փառատոնը:


Այս տարի փառատոնին մասնակցելու են հրավիրված մինչև 18 տարեկան շուրջ քառասուն շնորհալի պատանի երաժիշտներ աշխարհի տարբեր երկրներից (Հայաստան, Վրաստան, Ֆրանսիա, Ռուսաստան, Մալթա, Ուզբեկստան, Կորեա), ովքեր երևանյան ունկնդրին կներկայանան ինչպես նվագախմբային, այնպես էլ մենանվագ կատարումներով:


«Նոր անուններ»-ի այս տարվա մասնակիցների թիվը շուրջ մեկ տասնյակով ավելի է մեկնարկային տարվա մասնակիցների քանակից: Տարբերվում է նաև աշխարհագրությունը:


Համերգները կկայանան Հայաստանի պետական ֆիլհարմոնիկ նվագախմբի (գեղարվեստական ղեկավար և գլխավոր դիրիժոր Էդուարդ Թոփչյան) և Հայաստանի պետական կամերային նվագախմբերի (գեղարվեստական ղեկավար և գլխավոր դիրիժոր Վահան Մարտիրոսյան) հետ համագործակցությամբ: Մասնակիցների մեծ մասը միջազգային և հանրապետական մրցույթների ու փառատոների բազմակի դափնեկիրներ և տարբեր հիմնադրամների կրթաթոշակառուներ են, ովքեր բազմիցս ելույթներ են ունեցել աշխարհի հայտնի բեմերում:


Փառատոնային օրակարգը կներառի նաև մասնակիցների համար մշակութային ծրագիր (այցելություններ Երևանի կարևորագույն մշակութային հուշարձանները, զբոսանք Սևանա լճում, այց Մայր Աթոռ Սբ. Էջմիածին), որը պատանի երաժիշտներին թույլ կտա ոչ միայն առավել մտերմանալ, այլև օտարազգի մասնակիցներին կներկայացնի Հայաստանը և հայ մշակույթը: